Azatlıq Radiosı

2022-06-23 15:37:39 Украинаның Луһански өлкәсендә Русия гаскәрләре Лисичанскидан көньякка һөҗүмен дәвам итә. Кичә, 22 июньдә алар шәһәрдән якынча 20 километрда урнашкан Лоскутовка һәм Рай-Александровка бистәләрен алды.

Украина кораллы көчләре баш штабы һәм Луһански өлкәсе хакимият башлыгы Сергей Һайдай хәбәренчә, Русия гаскәрләре Лоскутовкадан төньяк-көнбатышка: Волчеяровка бистәсенә һәм көньякка таба - фронтның Золотое шәһәре янында чыгып торган өлешенә һөҗүм итә.

Русия һөҗүменең төп максаты- ике күрше шәһәр: Северодонецки һәм Лисичанскины көньяктан чолгап алу, алар украин гаскәрләренең Луһански өлкәсендәге соңгы ныклы терәге булып тора. Алга таба Русия гаскәрләре Северский Донец елгасына чыгарга тели, шул рәвешле Лисичански белән Северодонецки чолганышта калачак. Әлегә Белогоровка янында уңышсыз тәмамланган хәрби операциядән соң, Русия гаскәрләре елганы кичеп чыгарга омтылмый. Открыть/Комментировать

2022-06-23 14:31:14 Русиянең Украинадагы сугышына каршы фикер белдергән Казан дәүләт архитектура-төзелеш университеты (КГАСУ) Денис Мокрушинга басым дәвам итә. Имтиханны уңышлы тапшырса да, аңа билгесен куймыйлар, укытучысы Иван Краснобаев аның белән бу хакта сөйләшүдән баш тарта, дип язды “Гроза” студентлар журналы егет сөйләгәннәргә таянып.

Денис әйтүенчә, университет ректоры Рәшит Низамов студентны кабул итмәгән һәм укытучысы белән генә сөйләшкән, ә студент бу сөйләшүне тыңлап торган. Краснобаев аны һөҗүм итүдә гаепләгән диелә.

Шуннан соң студентны деканатка чакырганнар, очрашу кичә, 22 июньдә 15:00 сәгатьтә узарга тиеш булган.

“Гроза” басмасына студент үзе сөйләвенчә, сөйләшенгән вакытка уку йорты янына килгәч, Мокрушинны контроль пункттан уздырмаганнар, шундый күрсәтмә бар дигәннәр, әмма сакчы документны күрсәтүдән баш тарткан.

Шулай да, староста аша вазгытьне аңлаткач, университет мөдирлеге вәкилләре студент белән сөйләшкән. “Алар аңа җомганы көтәргә кушкан, укытучылар билгеләр куела торган документны тутырып тапшырсын, әгәр билгең куелмаса, “хәлне ачыкларбыз” дигән”, дип яза басма. Открыть/Комментировать

2022-06-23 12:46:04 Мәскәү татарлары һәм төрки халыклары милли конгрессы президенты Рөстәм Ямалиев "Урыс берлеге" оешмасы әгъзалары белән көнбатыш кыйммәтләренә каршы көрәшергә килешкән. Бу хакта Бизнес Online хәбәр итә. Алар Украинага каршы сугыш башлаган Владимир Путинның сәясәтен хуплап эш итүе турында сөйләшкән.

"Урыс берлеге" координаторы, "Азов. Украинаның кара кояшы" китабы авторы Алексей Кочетков татар оешмалары белән эшләү турында әйткән.

"Көнбатыштан куркыныч янаганда без урыс һәм татар оешмаларын гына түгел, традицион православ һәм мөселман кыйммәтләрен яклаучы барлык оешмаларны берләштерү максатын куябыз" дигән ул.

Рөстәм Ямалиев исә, Мәскәү татарлары конгрессы патриотик платформа нигезендә эшли дип белдергән.

"Милли конгресс яшьләр өчен үзебезнең кыйммәтләр турында сөйләүче 10 ролик төшерде. Без дәүләтнең һәм Русия президенты Владимир Путинның сәясәтен хуплыйбыз", дигән ул.

Ахырдан ике оешма да үзара хезмәттәшлек итергә килешкән.


Мәскәү татарлары конгрессы+"Урыс берлеге" хезмәттәшлеге Открыть/Комментировать

2022-06-23 11:25:07 Русиядә операторлар элемтә хезмәте килешүе төзегәндә SIM-карт өчен аерым акча түләтә башлаган. "МегаФон" һәм аның бүлендеге – Yota сим-карт өчен 50 сум ала башлаган да инде, дип яза "Коммерсантъ".

Билайн хезмәтне 21 июньнән түләүле иткән, бәясе шулай ук 50 сум. МТСта өстәмә акчаны 24 июньнән, ә Tele2-да 1 августтан ала башларга ниятлиләр диелә. Шул ук вакытта "Коммерсантъ"ка чыганагы МТСның кайбер төбәкләрдә сим-картлар өчен акчаны инде түләтә башлавын сөйләгән.

MForum аналитигы Алексей Бойко сүзләренчә, 24 февральгә кадәр, ягъни Русия Украинага каршы сугыш башлаганчы, Русия элемтә операторлары сим-картларны зур дөнья тәэминатчыларыннан алган, әйтик Европаның Gemalto, Giesecke & Devrient ширкәтләреннән. "Күпләп җитештергәнгә, аларның бәяләре чагыштырмача түбән иде. Европа җитештерүчеләреннән сим-картлар сатып ала алмый башлагач, операторлар Азия ширкәтләренә йөз тотарга мәҗбүр булды, аларныкы кыйммәтрәк", дигән ул. Открыть/Комментировать

2022-06-23 11:11:12 Җырчы Юрий Шатунов вафат.

Аңа 48 яшь иде. Җырчы Юрий Шатуновның, "Ласковый май" төркеменең җырлары хитлар иде.

Ул Кумертауда туган. Ятимнәр йортында тәрбияләнгән. Открыть/Комментировать

2022-06-23 10:30:01 20-22 июльдә Казанда "Русия һәм Татарстан халыкларының туган телләрен саклау чаралары" дип аталган фәнни конференция узды. Җыенга Мәскәүдән, Идел буе республикаларыннан тел белгечләре килде.

Тел белгечләре татар теленең интернетта чикләнгән тел булып калуын әйтә. Мари һәм чуаш теле белгечләре мәктәпләрдә туган тел укыту ике тапкырга диярлек кимүен белдерә. Ә урыслар урыс теле иң начар хәлдә дип, урыс теленә игътибарны тагын да арттырырга чакыра. Открыть/Комментировать

2022-06-23 10:01:08 Башкортстан башлыгы Радий Хабиров республикадагы Кеше хокуклары шурасының яңа исемлеген хуплады.

Шурага 36 кеше кергән, шуларның 15е бу шурада инде 2019 елдан эшләп килгән кешеләр.

Шураның җитәкчесе үзгәргән. Хәзер анда шураның элеке җаваплы сәркатибе булган Зөлфия Гайсина җитәкчелек итәчәк. Бөтенрусия инвалидлар җәмгыяте үзәк идарәсе әгъзасы Флюр Нурлыгаянов аның урынбасары итеп билгеләнде.

Бу исемлеккә тагын кемнәрне кертеп була иде дип саныйсыз?

Фото: Куштау Online телеграм каналы Открыть/Комментировать

2022-06-23 09:17:02 23 июнь иртәсенә кыскача хәбәрләр:

Чехия 2023 елның март ахырына кадәр Русия һәм Беларус ватандашларына виза бирмиячәк. Һуманитар максатлардагы сәфәрләр өчен искәрмә ясалачак.

Львовтагы мәхкәмә Русия президенты Владимир Путинның дусты, Украинаның халык депутаты Виктор Медведчукны 9 августка кадәр сак астында калдырды.

Екатеринбурда пәнҗешәмбе иртәсендә Экстремизмга каршы көрәш үзәге хезмәткәрләре "Мемориал"ның җирле бүлеге хезмәткәре тарихчы Алексей Моминны тоткарлаган. Мосин бүген Ельцин үзәгендә узучы "Сталинизм тарихы" дигән XIV Халыкара фәнни конференциядә катнашырга тиеш булган.

"Эхо Москвы"ның элеккеге баш мөхәррире Алексей Венедиктов радионы торгызырга планлаштыра. "Мәхкәмә радионы бетерү карарын канунсыз дип санар дигән ышанычта калабыз. Аннары, әлбәттә, без лицензияне мәхкәмә аша кайтарырбыз ", ди Венедиктов.

@azatliqradiosi Открыть/Комментировать

2022-06-22 20:18:01 Чаллы шәһәр мәхкәмәсе прокуратураның Сәид Нурси китапларын экстремистик дип тану турындагы дәгъвасын караудан баш тарткан. Бу хакта адвокат Руслан Нәгыев Telegram каналында белдерде.

Узган ел Чаллы шәһәр мәхкәмәсе Сәет Нурсиның төрек телендәге китапларын экстремист материал дип таныган иде. Нәгыев мәхкәмә комплекслы экспертиза ясамауда гаепләп, карарны шикаять итте. Татарстан Югары мәхкәмәсе Чаллы мәхкәмәсе карарын кире какты һәм кабат эшкә кайтарды.

"Без үзебезнең шикаятебездә мәхкәмә Сәид Нурсиның иске төрек, яисә төрек-госманлы телендә язылган әсәрләре телен белмәвен күрсәттек. Әлеге китапларның тәрҗемәләре тәкъдим ителмәде, мәхкәмә-лингвистик экспертиза ясалмады, димәк, әлеге китаплар экстремистик дип атарга ярамый", ди ул.

Нәгыев сүзләренчә, 21 июньдә Чаллы мәхкәмәсе прокуратураның дәгъвасын караудан баш тарткан. Открыть/Комментировать

2022-06-22 19:30:42 Әнкарада 2011 елда ачылган татар шагыйре Габдулла Тукай бюсты яңартылган. Бу хакта Азатлыкка җәмәгать эшлеклесе Роза Корбан хәбәр итте.

“Хәрефләре коелган, буялары уңган, мәрмәр ташлары җимерелгән иде. Татар шагыйре бюстының шундый хәлдә торуына йөрәгем авыртты. Шуннан 50 метр якында гына урнашкан Казан татарларының мәдәни һәм ярдәмләшү үзәгенә мөрәҗәгать иттем, алар “мондый эшкә акчабыз юк” диде. Шуннан Әнкарадагы шәһәр идарәсенә яздым, алар чүбен утап һәм юып кына китте.

Ахыр чиктә бюстны мәрмәр эшләре белән шөгыльләнүче Emre Taş Madencilik Şirketi җитәкчесе Яшәр Дуран (Yaşar Duran) үз өстенә алды. Алар яңа мәрмәр ташлар куйды, хәрефләрен яңартты. Бюст бик матур булды.

Моңа кадәр шагыйрә Сания Гыйффәт Уган (Кадыйрова) һәйкәленә акчаны кырымтатар, Тукайга төрек кешесе бирде”, диде Роза Корбан. Открыть/Комментировать