Светлана Тихановская

Святлана Ціханоўская: «Хачу, каб гэтую выставу пабачыў кожны еўрапейскі палітык»

Сёння ў Вільні беларуская лідарка наведала адкрыццё выставы «Беларускі мартыралог». Гэта серыя партрэтаў беларускіх палітзняволеных мастачкі Ксішы Анёлавай. На пачатку восені яна прэзентавала выставу ў Еўрапарламенце ў Страсбургу.

У цыкл уваходзіць больш за 600 карцінаў. На жаль, колькасць палітзняволеных у Беларусі кожны дзень павялічваецца. Таму творца працягвае працу, пакуль не будзе намаляваны апошні з тых, хто несправядліва ўтрымліваецца ў турме.

«Калі я гляджу на гэтыя партрэты – мне балюча. Шмат з гэтых людзей я ведаю асабіста. Я не магу ўявіць, як ім складана цяпер і фізічна, і псіхалагічна. Але я таксама ведаю, што яны там – разлічваюць на нас з вамі. Тэма палітвязняў павінна гучаць кожны дзень – на міжнародных форумах, высокіх сустрэчах і ў публікацыях СМІ», – адзначыла на адкрыцці выставы Святлана Ціханоўская.

Таксама ў гэтую суботу, 25 лістапада, на выставе Ксішы Анёлавай а 16:00 пройдзе перформанс «Беларускія палітычныя вязні гавораць» з зачытваннем тэкстаў, напісаных нашымі героямі. Запрашаем усіх жадаючых наведаць імпрэзу!

Святлана Ціханоўская выступіла на Web Summit

Па запрашэнні прэм'ер-міністра Партугаліі беларуская лідарка распавяла пра Беларусь на адной з самых уплывовых тэхналагічных канферэнцый Еўропы.

Святлана Ціханоўская распавяла пра ролю тэхналогіяў у беларускім супраціве. У якасці прыкладаў яна прывяла платформу «Голас» і платформы для краўдфандынгу, а таксама «Беларускі гаюн», «Новую Беларусь» ды іншых. Беларуская лідарка заклікала тэхналагічныя кампаніі аказваць падтрымку беларускім незалежным медыя, блогерам і журналістам.

Асобна Ціханоўская заклікала ўдзельнікаў падтрымліваць Украіну для яе перамогі ў вайне. І патлумачыла, што гэтая перамога можа даць шанец і на перамены ў Беларусі.

Святлана Ціханоўская і прадстаўнікі беларускага бізнесу сустрэліся з дзяржсакратаром Партугаліі Бернарда Іва Крузам

У мерапрыемстве, што адбылося ў МЗС Партугаліі ў Лісабоне, разам з лідаркай дэмакратычных сілаў Беларусі ўзялі ўдзел кіраўнікі нашых стартапаў, што працуюць у Партугаліі, а таксама прадстаўніца стартап-хаба Imaguru Анастасія Хамянкова.

Падчас сустрэчы Ціханоўская падзякавала спадару Крузу за падтрымку рэлакаванага беларускага бізнесу – і заклікала партугальскі ўрад змякчыць умовы для працы бізнесоўцаў.

Прадстаўнікі беларускіх кампаній распавялі дзяржсакратару пра праблемы, з якімі сутыкаюцца падчас працы ў Партугаліі. Асобна закранулі пытанне адкрыцця банкаўскіх рахункаў і падаткавую нагрузку для IT-кампаніяў.

Таксама ў дыялогу падымаліся юрыдычныя пытанні: спрашчэнне легалізацыйных момантаў, адмена патрабавання апастылю на дакументы, выдача пашпартоў замежніка, афармленне папераў для беларускіх дзяцей, што нарадзіліся ў Партугаліі.

МЗС Партугаліі вызначыць кантактную асобу, каб працягваць камунікацыю па вырашэнні азначаных праблем.

Беларуская лідарка падкрэсліла: рэлакаваны беларускі бізнес працуе на карысць дэмакратычных зменаў у краіне, дапамагае рэпрэсаваным ды палітзняволеным, падтрымлівае беларускія ініцыятывы, а таксама нашых добраахвотнікаў ва Украіне.

Святлана Ціханоўская сустрэлася з канцлерам Германіі Олафам Шольцам у Малазе

Лідары абмеркавалі рэзалюцыю па Беларусі, прынятую на гэтым тыдні нямецкім Бундэстагам. Ціханоўская выказала жаданне найхутчэйшай імплементацыі гэтага дакументу.

Падчас дыялогу беларуская лідарка заклікала канцлера падтрымаць міжнароднае расследаванне злачынстваў Лукашэнкі, у прыватнасці – злачынстваў супраць чалавечнасці і вывазу украінскіх дзяцей у Беларусь.

Таксама Святлана Ціханоўская запрасіла канцлера далучыцца да Дня салідарнасці з Беларуссю 12 лістапада і падтрымаць беларускіх палітвязняў.