Светлана Тихановская

Святлана Ціханоўская адкрыла першую беларуска-эстонскую Канферэнцыю

Сёння ў Таліне распачалася маштабная Канферэнцыя, арганізаваная міністэрствам замежных справаў Эстоніі ў супрацоўніцтве з Офісам Святланы Ціханоўскай – і з’яўляецца першай у такім фармаце. Мерапрыемства сабрала каля 250 удзельнікаў. Гэта прадстаўнікі Аб’яднанага Пераходнага Кабінета, Каардынацыйнай Рады, беларускія актывісты і медыя, а таксама члены эстонскага ўраду, эксперты і дыпламатычны корпус.

На Канферэнцыі абмяркоўваюцца эстонска-беларускія адносіны, стратэгія па Беларусі, спосабы падтрымкі рэпрэсаваных і палітвязняў, шляхі прыцягнення рэжыму да адказнасці.

Святлана Ціханоўская выступіла на адкрыцці Канферэнцыі і прывітала ўдзельнікаў:

«Мы будуем міжнародную кааліцыю ў падтрымку незалежнай і свабоднай Беларусі. Эстонія з’яўляецца адным з нашых ключавых саюзнікаў. Гэта не дзіва: беларусы і эстонцы цудоўна разумеюць і падтрымліваюць адно аднаго. Нездарма пасля падзей 2020-га года многія беларусы, уцякаючы ад рэпрэсіяў, знайшлі прытулак тут, у Эстоніі. Я дзякую эстонскаму ўраду і народу Эстоніі за прынцыповую і непахісную падтрымку дэмакратычнай Беларусі».

Святлана Ціханоўская абмеркавала з прадстаўніцай YouTube падтрымку беларускай мовы на платформе

Беларуская лідарка наведала рэгіянальны офіс YouTube у Берліне, дзе сустрэлася з кіраўніцай платформы, адказнай за сувязі з урадамі, Сабін Франк.

На сустрэчы абмеркавалі падтрымку беларускай мовы ў YouTube. Цяпер нашая мова падтрымліваецца ў бальшыні сэрвісаў YouTube, даступная ў інтэрфейсе і дазваляецца манетызацыя беларускамоўнага кантэнту.

Прадстаўніца YouTube адзначыла, што магчымасць падтрымкі беларускай мовы ў Google Ads ужо абмяркоўваецца. YouTube адсочвае і імкнецца выдаляць «пакаянныя» відэа, каналы і акаўнты прапагандыстаў.

Таксама Ціханоўская і Франк абмеркавалі магчымасць арганізацыі трэнінгаў для беларускіх медыя і ініцыятываў з удзелам спецыялістаў YouTube.

Нямецкі Бундэстаг прыняў рэзалюцыю па Беларусі

Сёння Святлана Ціханоўская выступіла перад Камітэтам па міжнародных справах Бундэстагу і заклікала дэпутатаў прыняць рэзалюцыю па Беларусі. Пасля ў Бундэстагу адбыліся дэбаты, дзе была прынята рэзалюцыя «За дэмакратычную Беларусь у еўрапейскай сям’і».

У тэксце рэзалюцыі адзначаецца: «Нямецкі Бундэстаг цвёрда стаіць на баку ўсяго беларускага дэмакратычнага руху, Святланы Ціханоўскай і ўзначаленага ёй Абʼяднанага Пераходнага Кабінета. Беларусы павінны ведаць, што свабодную і дэмакратычную Беларусь будуць вітаць у сямʼі еўрапейскіх дзяржаваў».

Парламент Германіі прывітаў абмежавальныя меры, што ўжо ўведзены супраць лукашэнкаўскага рэжыму, і заклікаў федэральны ўрад працягваць ціск. У той жа час у рэзалюцыі сказана, што Германія паспрыяе развіццю беларускай незалежнай прэсы, дэмакратычных інстытутаў і грамадзянскіх ініцыятываў. Акрамя таго, ухваляецца дапамога і рэабілітацыя палітвязняў ды асобаў, пацярпелых ад рэпрэсій.

Асобная ўвага ў рэзалюцыі прысвечаная юрыдычным пытанням, з якімі зараз сутыкаюцца беларусы ў выгнанні. Бундэстаг будзе спрыяць вырашэнню праблемаў беларусаў з дакументамі.

Святлана Ціханоўская: «У нас ёсць моцная міжнародная кааліцыя саюзнікаў»

Беларуская лідарка выступіла ў Берліне на першай сустрэчы Альянса групаў «За дэмакратычную Беларусь». Такія групы ўжо існуюць у 22 краінах свету. Удзел у мерапрыемстве ўзялі кіраўнікі парламенцкіх групаў з Аўстрыі, Францыі, Грузіі, Германіі, Італіі, Латвіі, Літвы, Люксембурга, Малдовы, Нарвегіі, Польшчы, Партугаліі і Іспаніі. Анлайн далучыліся парламентарыі з Ірландыі, ЗША і Украіны.

У прамове Святлана Ціханоўская падкрэсліла, што трэба працягваць ціск на рэжым і патрабаваць неадкладнага вызвалення палітвязняў. Таксама яна заклікала дэпутатаў спрасціць працэдуры легалізацыі беларусаў у выгнанні:

«Нам трэба комплекснае рашэнне, якое ўключыла б у сябе выдачу пашпартоў замежніка, падаўжэнне відаў на жыхарства і спрашчэнне юрыдычных працэдураў. Са свайго боку, мы рыхтуемся выдаваць новы беларускі пашпарт. Я прашу вас падтрымаць гэты праект у вашых Парламентах».

Асобна беларуская лідарка заклікала падтрымаць еўрапейскія памкненні беларусаў:

«Для нас Еўрапейскі Саюз – адзіная альтэрнатыва «рускаму свету». Свету гвалту, несправядлівасці і тыраніі. Толькі ў Еўрапейскім саюзе Беларусь можа захаваць незалежнасць і гарантаваць дабрабыт сваім грамадзянам».

Напрыканцы свайго выступу Святлана Ціханоўская заклікала ўдзельнікаў мерапрыемства далучыцца да Дня салідарнасці з Беларуссю 12 лістапада.

Святлана Ціханоўская прыняла ў сваім Офісе новага амбасадара Чэхіі

Алеш Опата будзе прадстаўляць інтарэсы Чэхіі ў Літве, а таксама падтрымліваць сувязь з дэмакратычнымі сіламі Беларусі.

Падчас размовы беларуская лідарка і Алеш Опата абмеркавалі пытанні легалізацыі беларусаў у Чэхіі, у тым ліку выдачу пашпартоў замежніка для нашых грамадзянаў, якія не могуць вярнуцца дамоў. Такі пашпарт ужо атрымала юная беларуска Вара, якая дапамагае нашым добраахвотнікам ва Украіне.

Таксама Святлана Ціханоўская запрасіла амбасадара далучыцца да Дня салідарнасці з Беларуссю 12 лістапада. І прапанавала арганізаваць супольныя мерапрыемствы ў Вільні.