2021-04-11 13:36:53
Яқинда ижтимоий тармоқларда қайсидир юртдан машҳур "табиб" келгани, омма уни чор атрофидан ўраб, ундан ўзлари ва яқинларини даволашини илтимос қилаётгани ҳақидаги видеолавҳалар тарқалди.
Омма дарров икки лагерга бўлинди: кимдир уни қаллоб деса, яна кимдир у пул олмай даволаётганини иддао қилди.
Шу онда қизиқ бир ҳолатлар юзага чиқди. Мактаб ҳамда ўқув масканларида ҳижобга ошкора қаршиликлар бўлаётганига жавобан ҳеч бир муносабат билдирмаган кишилар, сиёсатшунослар ва имомлар негадир айнан шу "табиб"га раддиялар билан чиқишди, инсонларни алданиб қолмасликдан огоҳлантира бошлашди.
Мусофир ўз саёҳатини давом эттириш учун аллақачон ҳудудни тарк этди. Муслима қизларнинг рўмоли яна актуал мавзуга қайтди. Аммо негадир яна жим-житлик!
Яқинда Жаҳонгир Отажонов партия тузиш илинжида Туркияда қайсидир инсон билан кўришгани ҳақидаги хабарлар тарқалиши биланоқ имомларимиз Жаҳонгир Отажоновга нисбатан раддиялар билан минбарга чиқишди.
*
Майли, ҳозир бу ҳақида эмас, анави табибга қайтамиз.
Мусофирни ўраб олиб, ундан дуо ҳамда муолажа сўраётган халқни соддалик, аҳмоқликда айблаб чиққанлар ҳам бўлди.
Уларни ҳажв қилганлар, видеомем қилганлар ҳам бўлди.
Аммо биз бу ерда бироз ноҳолис ёндашганимизни тан олишимиз керак.
Агар сизни ҳеч бир дард безовта қилмаса, касал бўлганингизда вақтида муолажа сабабиятини қилсангиз, сизни мана шундай табибларнинг қошига отланишга ҳеч қандай ҳожат қолмайди.
Даво истаганларни аксариятига аҳамият берсангиз, уларнинг кўп қисми шифохоналарда дарбадар бўлган, муолажаларнинг нархидан чорасиз қолган, шифокорларнинг лоқайдлигидан зада бўлган авом халқ эди.
"Чўкаётган инсон хасга ҳам ёпишади" деганларидек, сиз ҳам болангизни дўхтирма-дўхтир, табибма-табиб судраб юриб, тинимсиз равишда дорилар ҳарид қилиб, борингизни бағишлаб, аммо самара кўрмай, кўз олдингизда болангиз дарддан азоб чекаётганини кўрсангиз, ноиложликдан, сўнгги умидни қаллобга ҳам боғлайсиз.
Мендан шу кимсани манзилини топишда ёрдам сўраган инсон ҳам бўлди. Кўпчилик қатори мен ҳам у инсонга табиб ҳақида омма нима фикрдалигини айтдим. Аммо олган жавобим мени баттар эзди:
"Биламан, ҳамма "машенник" двоти, лекин болами кўриб, бир дуо қиб қўйса, боламам ўзини сал енгил ҳис қиб, бир кеча бўсаям оғриқсиз ухласа дигандим..."
Билсам, бечора боласи бир неча маротаба жарроҳлик столига ётган, шифокорлар ҳар гал турлича дориларни ёзишган, аммо боланинг аҳволида ўнгланиш бўлмаган. Содда она ўқитмаган домласию, олиб бормаган табиби қолмаган.
*
Агарда шу машҳур инсон Германия ёки Жанубий Кореяда шундай саҳоватни иддао қилганида, унинг атрофида 10та ҳам инсон тўпланмасди. Чунки у давлат фуқаролари ўз тиббиёти ҳамда касалхоналарига жуда ишонади. Уларнинг ишончи бу соҳа вакиллари томонидан оқлангани учун ҳам уларда шундай ишонч юзага келган...
Бечора бемор фуқароларимизни калака қилавермасдан, муаммонинг асл сабабини ўзимиздан қидирсак мақсадга мувофиқ бўлармиди...?
@eslatdim
779 viewsedited 10:36
S
