2022-02-05 14:29:25
#берёза #гара_цэгла #sacral_fortificatio #sacral_catholic #sacral_photo
Пачнем здалёк. У канцы ХІ стагоддзя будучы каталіцкі святы, а ў той час манах і святар, Бруна Кёльнскі разам са сваімі паплечнікамі заснаваў братэрства ў гарах сучаснай паўднёвай Францыі - мястэчку Шартроз. Па-лацінску назва гучыць як "сartusia", таму і будучы ордэн быў празваны картэзіянскім\картузіянскім, а самі кляштары называлі картэзіямі. Па ўсёй Еўропе іх налічвалася 196 у перыяд XV-XVI ст.
Адзін з такіх з'явіўся і ў ВКЛ у XVII стагоддзі. Фундатарам яго стаў падканцлер Казімір Леў Сапега.
Кляштар быў пабудаваны ў барочным стылі. Галоўным будынкам яго быў 3-нефавы касцёл Святога Крыжа. Шпіталь, аптэка, шматлікія гаспадарчыя пабудовы - усё за мураванымы сценамі з вежамі. А яшчэ абарончы роў.
У сярэдзіне жылыя памяшканні святароў, якія ўтваралі замкнёную кампазіцыю. Кожная келья ўяўляла сабою асобную капсулу з пакоям і невялікім дворыкам. Манахі-картузы спалучалі жыццё пустэльнікаў і існаванне ў супольнасці. Таму амаль увесь час яны праводзілі моўчкі і ў адзіноце. Толькі тры разы на дзень збіраліся для агульнай літургіі. Раз на тыдзень ім дазвалялася пакідаць межы кляштара на некалькі гадзін. Тады яны шпацыравалі, разбіўшыся на пары і менавіта тады ім дазвалялася размаўляць паміж сабою. Такіх манахаў было ня шмат - 14-16.
Але былі і манахі-браты, якія не жылі ў такой строгай аскезе. Яны забяспечвалі існаванне прыстанкі: працавалі ў садзе, гатавалі ежу, займаліся ўборкай і іншымі працамі.
Кляштар з'яўляўся буйным землеўладальнікам і крэдыторам.
Браты ордэна падтрымалі паўстанне 1830-31 гг. Таму пасля яго здушэння расейскімі вайскамі, кляштар быў зачынены, а яго маёмасць перайшла да кадэцкага корпуса.
Пасля паўстання 1863 г. частка будынкаў была разабраная, каб з гэтай цэглы пабудаваць казармы...
Увогуле, аб'ект стары, маштабны, можна шмат напісаць усякага. Але, здаецца, допіс і так расцягнуўся. Каб вы разумелі, гэта мой трэці візіт да яго. Здаецца, ён значна менш вядомы, чым Гальшаны ці Ружаны (апошнія нават даволі блізка ад Бярозы). Гэта, насамрэч, прыемна. Там нікога не сустрэнеш, усе руіны ў тваім распараджэнні! Але я вам скажу па сакрэце, толькі нікому , абавязкова наведайце, калі яшчэ гэтага не зрабілі.
Шмат здымкаў і старых выяў з указаннем датыроўкі глядзіце ў альбоме.
611 viewsedited 11:29