2022-05-04 12:08:32
Учора была Радаўніца — важнае рэлігійнае свята для беларусаў. І сёння мы хочам расказаць пра гэты дзень больш падрабязна.
Радаўніца — дзень памінання памерлых, у які са старажытных часоў адбываліся трапезы на магілах бацькоў. Праваслаўная Царква і Беларуская Грэка-Каталіцкая Царква ўключылі Радаўніцу ў свой культ, аднак яны не ўхваляюць некаторых звычаяў гэтага свята (напрыклад, пакідаць вялікоднае яйка «для спачылых»).
Як жа традыцыйна праводзілі гэты святочны дзень?
Падрыхтоўка да свята пачыналася дома. Уся сям'я апраналася ў святочнае адзенне, збірала з сабой ручнікі, велікодныя яйкі, прыгатаваныя загадзя стравы і адпраўлялася на могілкі.
Па магілках сваякоў каталі фарбаваныя велікодныя яйкі, потым накрывалі магілы ручнікамі і ставілі на іх розную ежу «для памерлых».
Потым пачыналася застолле.
Спачатку казалі: «Святыя бацькі, хадзіце да нас хлеба-солі паесці». Потым садзіліся, выпівалі і закусвалі.
Устаючы, казалі: «Мае бацькі, прабачце, не злуйцеся, чым хата багатая, тым і рада».
Застолле часцей за ўсё прадаўжалася і дома, але ўжо ў больш вясёлай форме.
А ўвечары маладыя хлопцы і дзяўчаты збіраліся разам, каб спяваць, танцаваць і гуляцца!
Адсюль і прыказка: «Раданіца па абеду плача, а пасля абеду скача».
У кожным раёне Беларусі існуюць свае асаблівыя традыцыі на Радаўніцу. Калі ў вашай сям'і захаваліся нейкія цікавыя рытуалы — будзем рады даведацца пра іх у каментарыях!
258 views09:08