Azatlıq Radiosı

2022-06-16 15:04:47 Бүген башкорт халкының милли каһарманы Салават Юлаевның тууына 268 ел. Бәйрәм уңаеннан Башкортстанның опера һәм балет театрында "Сынмаган рух" ("Несломленный дух") исемле тамаша узачак.

Концертка килүчеләр "Салават Юлаев" фильмыннан Арам Хачатурян композицияләрен, шулай ук башкорт композиторлары музыкасын тыңлый алачак диелә.

1940 елда чыккан "Салават Юлаев" фильмыннан музыканы композитор һәм дирижёр Ринат Камалов сюитага туплаган.

Тулырак хәбәр көзге сайтта. Открыть/Комментировать

2022-06-16 13:46:23 Петербурдагы халыкара икътисади форумда Көнбатышның бер генә зур инвесторы да катнашмый. Чарада Русия миллиардерларыннан алты кеше генә бар диелә.

Кичә форумны фетнәчел “Донецки халык республикасы" башлыгы Денис Пушилин Петербур губернаторы Александр Беглов белән бергә туптан атып ачты, ә бүген Русия мәгълүмат чаралары аның Украинадагы "махсус операция" ел ахырына кадәр бетәргә мөмкин, дигән сүзләрен язып чыкты.

Пәнҗешәмбе иртән форумда Үзәк Банк рәисе Эльвира Нәбиуллина, президент ярдәмчесе Максим Орешкин һәм финанс министры Антон Силуанов чыгыш ясады.

Нәбиуллина Русия икътисады өчен шартлар "озакка, ә бәлки мәңгегә үзгәрде", һәм хәзер җитештерүне эчке базарга юнәлдерергә кирәк, дип белдерде.

Орешкин исә совет чорындагы икътисад төренә кире кайтмаячакбыз, бөтен әйберне дә илдә җитештерү булмаячак, диде. Шулай ук ул рубльнең ныгуы – вакытлыча, бер доллар 70-80 сум торса, икътисад өчен яхшы булыр иде дигән фикер белдерде.

Тулырак хәбәр көзге сайтта. Открыть/Комментировать

2022-06-15 20:30:25 Кич утырып укырга мәкалә: Эмиграциядәге татарлар нигә пассив

Узган җомга Русиядә татарларга һәм Татарстанга кагылышлы ике мөһим вакыйга булды. Татарстан Югары мәхкәмәсе Бөтентатар иҗтимагый үзәген (БТИҮ) экстремист оешма дип таныды һәм аның эшчәнлеген тыйды.

Актанышта бер православ кешенең каберендәге тәре икенче мәртәбә кисеп ташланганнан соң район башлыгы, республиканың элекке мәгариф министры Энгел Фәттахов вазифасыннан китәчәген белдерде.

Сәясәт белгече Руслан Айсин боларны татарларга карата икеләтә орым дип бәяләде. Әмма республикадагы татарлар да, Русиянең башка төбәкләрендәгеләре дә тавыш күтәрмәде, хәтта чит илләрдәге татарлар да бу хәлләргә күз йомды. Русиядә сан ягыннан икенче урындагы халык булган татарларның илдән читтәге вәкилләре нигә шулай пассив булуы турында безнең язма.

Мәкалә Азатлыкның төп сайтында VPN белән: https://www.azatliq.org/a/31899440.html
Яки көзге сәхифәдә: https://do1oc3pvp62pb.cloudfront.net/a/31899440.html
Телеграмда гына да укырга була Открыть/Комментировать

2022-06-15 20:00:50 Татарстаннан тагын бер сугышчы Украинагы сугышта һәлак булган.

Алексей Пашагин - Лаеш районы Никольское авылыннан, 33 яшь. 23 майда һәлак булган, 13 июньдә туган авылында җирләнде.

Пашагин мәктәпне тәмамлаган Казан федераль университетының тарих факультетына укырга кергән, әмма бер елдан армиягә киткән. 2018 елда контракт төзегән.

Украинага җибәрелгәнче Хабаровски каре Таежное авылындагы хәрби бүлектә хезмәт иткән. Үлеме турында "Камская новь" газеты хәбәр итте. Открыть/Комментировать

2022-06-15 19:30:54 АКШ хөкүмәте Русия кулланучыларына томаланган сайтларга керү мөмкинлеге бирүче VPN-сервисларга өстәмә акча бүләчәк.

Шулай итеп Вашингтон русияләргә интернетта цензураны урап узарга ярдәм итмәкче. Бу хакта Reuters агентлыгы хәбәр итә.

24 февральдән соң VPN-сервисларны 24 миллион русияле куллана. Бу 2022 ел белән чагыштырганда 15 тапыр күбрәк дип яза Times.

Русия Украинага сугыш башлаганнан соң Роскомнадзор хакимият фикерен генә алга сөреп бармаган матбугат чараларын, Facebook һәм Instagram социаль челтәрләрен томалады. VPN-сервисларны да Русиядә әледән-әле томалап торалар.

Томалауларга Азатлык та эләкте. Сәхифәбезне ничек укырга мөмкинлеге турында монда бик яхшылап язылган. Иң мөһиме, Телеграм каналда калыгыз. Открыть/Комментировать

2022-06-15 19:02:09 Татарстан 2021 елда үз керемнәре буенча Русиядә җиденче урынга төшкән

Бу хакта республиканың финанс министры Радик Гайзатуллин Дәүләт шурасы утырышында белдерде.

Узган ел Татарстанның кереме 336 млрд сум тәшкил иткән. Республиканы Свердлау өлкәсе (361,6 млрд сум), Красноярски крае (402,8 млрд сум) узып киткән. Беренче урынны Мәскәү шәһәре били. 2021 елда аның еллык кереме 3,2 трлн сумга җиткән. Русия башкаласының кереме Татарстанныкыннан 10 тапкырга диярлек күбрәк дигән сүз.

2021 елда Татарстанда җыелган салымның 70 проценты Мәскәүгә киткән. Республика казнасының төп өлешен һаман да нефть һәм нефть химиясе алып тора. Узган ел бюджетның кереме 50 процентка шушы тармакка бәйле булган.

Рәсмиләр исәпләвенчә, ел дәвамында Татарстан бюджеты якынча 21 млрд сум керемен югалтырга мөмкин.

Хәбәрне Азатлык сайтында укырга мөмкин Открыть/Комментировать

2022-06-15 18:30:39 Татарстаннан тагын бер сугышчы Украинагы сугышта һәлак булган.

Илмир Монасыйпов – Мөслим районы Ташлыяр авыланнан, 30 яшь. Үлеме турында Мөслим районы газеты хәбәр итте. Открыть/Комментировать

2022-06-15 18:01:42 Казан диварларында ике тамга.

Яшел йөрәк һәм күгәрченнәр - тынычлык символы, сугышка каршы булу билгесе. Ул Мөштәри урамындагы биналарның берсенә ясалган.

Z хәрефе - сугышны яклау, кайберәүләр аны хәтта яңа свастика дип саный. Монысы Салмачы бистәсендә.

#zәхмәт #zалимият

Кызыклы фотоларыгызны @azatliqradio аккаунтына җибәрергә мөмкин. Открыть/Комментировать

2022-06-15 17:40:07 Газ сату-алу белән бәйле берничә яңалык бар:

Газпром "Төньяк агымда" тагын бер насосны туктатты. Хәзер бу торбадан Европага тәүлегенә күп дигәндә 67 млн куб метр гына газ барачак. Газүткәргечнең тулы куәте – 155 млн куб метр. Ширкәт Siemens агрегатларын куллану вакыты чыгуга сылтана. Аларның бер өлеше Канадага ремонтка җибәрелгән булган, санкцияләр аркасында кайтарып булмый диелә.

Әлеге хәбәрдән соң Европа биржасында газның бәясе 15 процентка артты һәм бер мең куб метры 1200 долларга җитте.

Европа берлеге Израил һәм Мисыр белән Европага сыекландырылган табигый газ сату турында килешү төзеде. Израилдә газ чыгарыла, Мисырда аны сыекландыру һәм экспортлау өчен кирәкле куәтләр бар. Үз чиратында Европа берлеге Израил һәм Мисырга газ чыгаруны арттырырга, шулай ук диңгездә яңа газ чыганаклары эзләргә ярдәм итәчәк. Бу Европа берлегегә Русиянең энергия чыганакларына булган бәйлелектән котылырга, Израил белән Мисыр арасындагы хезмәттәшлекне ныгытырга да ярдәм итәчәк диелә. Открыть/Комментировать

2022-06-15 17:10:55 Хәзер Русиядән туры рейслар белән 19 илгә генә очарга мөмкин

ВВС исәпләп чыгаруынча, Хәзерге вакытта Русиядән туры рейслар белән 19 илгә очарга мөмкин. 24 февральдә Русия Украинага каршы сугыш башлаганнан соң Русия очкычлары өчен күп илләрнең һава киңлекләре ябылды, санкцияләр аркасында Русия очкычлары чит илләргә оча алмый башлады диярлек.

Сугышка кадәр 50 илгә туры очышлар булган. Әле ул вакытта ковид чикләүләре дә бар иде. Открыть/Комментировать