Поэзия дүйнөсү📝🌺

2022-06-20 08:12:17 СЫНООГО СЫНБАЙМ!

Сыноо берсе турмуш мага камчылап,
Сынбайм бирок көкүрөгүм жанчылат.
Шүгүр кылам ал күнгө да тообо деп,
Шүүдүрүмдөй көздөн жашым тамчылап.

Жалган өмүр кимди гана сынабайт,
Жакшы күндү ар күн сайын кынабайт.
Жеңип өтөм эмне сыноо келсе да,
Эрким күчтүү, сыноолорго урабайт.

Кудай салган күндү башым көтөрөт,
Жашыйт бирок шүгүр кылып көкөлөйт.
Караңгынын аркасында ак таң деп,
Үмүт өчпөй алга карай жетелейт.


Жараткандын колунда да тагдырым,
Жазып койгон тизмек кылып ар бирин.
Бүк түшпөстөн чыдап койсом баарына,
Менден өзү ыраактайт да кайгы -муң!

МАЛИК НАЗАРМАТОВ!!! Открыть/Комментировать

2022-06-19 07:08:16 ЭҢСӨӨ

Кетсем мен да кеткендердей жер кезип.
Көрсөм мен да силер айткан жомокту.
Чогуу жүрсөм бакыт менен элдешип.
Жашоо өткөрсөм, мөмөлүү да, боёктуу.

Кек, күмөндү, ит өмүрдү ыргытып.
Адамдыкты алып алсам жаныма.
Жалган, күйүт, бороон, туман, сын бүтүп.
Жарык гана коштоп жүрсө дайыма.

Ааламды ээлеп жалгыз сүйүү гүлдөсө.
Ага окшогон сезим алдап, азгырбай.
Кудай мага жакшы кептен сүйлөсө.
Күйүт ырдан, күлкү ырымды аз кылбай.

Эч болбосо талкалануу, өкчөлүү...
Эркин болсом, эрке болсом, сынбасам.
Мээрим толо дүнүйө дейт көптөрү.
Мен да ошондой ырларымдан ырдасам.

Ыйбаалуулук жактан болбой бүлүнүү.
Аруулансам ар күн сайын жаңыдан.
Ээртип алып, аяр, таза сүйүүнү.
Бул ааламга болуп келсем жаңы жан.

Сактап калып аруу, таза сүйүүнү.
Аруу бойдон кетсем экен дагы да!!!

АЙНАРА БААТЫРБЕК КЫЗЫ
Ош шаары
⁰¹·⁰⁵·²²
(01:06) Открыть/Комментировать

2022-06-16 20:10:53 Эчен ирет чарчап келип ишинен,
Эң изгисин тандап сөздүн ичинен.
Эркелетип, маңдайымдан сылачу,
"Эрмегим",- деп, "зирек кызым, кичинем."

Ал ансайын өрөпкүтүп балалык,
Ашкан эрке болгондугум дагы анык.
Апамды да укпай шоктук кылчумун,
Атам үйдө жүргөнүнө таянып.

Эже-агамдын жерге таштап сөзүн же...
ээн баштык кылсам дагы көзүнчө.
"Атасынын эрке кызын урбайт",- деп,
Ал убакта баатыр элем өзүмчө.

Кылсам дагы кызга жат көп жорукту,
Кылыгыма атам дайым болушчу.
Жадаганда "көктүгүмөн" апамдар,
"Жазбай тарткан атасын",- деп коюшчу.

Жумушунан кармалганда, кеч келбей,
Жолду карап, убакытты өткөрмөй...
Алып келген момпосуйду "Мен жейм!",- деп,
Адат эле чөнтөктөрүн текшермей...

Афина Бакирова Открыть/Комментировать

2022-06-16 16:29:33 Сезген элем жети катар туюмдан,
Сени мага тагдыр өзү буюрган.
Апрелдин ошол күнкү жамгыры,
Арзуу болуп төбөбүздөн куюлган.

Ошол көктөм төлгөсүндөй тагдырдын,
Мен сүйүүгө акылымды алдырдым.
Көкүрөккө толуп кеткен көз жашым,
Күүсү болуп агып турду жамгырдын.

Алты кабат айлампалуу жолдомун,
Айтып болбос бул тагдырдын болжолун.
Билесиңби, сага келген ушул жол,
Кандай татаал, кандай азап болгонун?!

Сен деңизсиң толкундары түрүлгөн,
Мен желаргы сени көздөй жүгүргөн.
Билбейм бизди кайда алпарат бул тагдыр,
Биротоло келдим сага бүгүн мен.

Э.А. Открыть/Комментировать

2022-06-15 06:54:30 КҮТҮҮ МЕНЕН ЖАШАП ӨТӨМ ДҮЙНӨДӨН

Телефондор...
Бүгүн дүлөй, кереңдей,
Тунжурашат – укпай, сезбей, кебелбей!
Ал ансайын күнүм түшүп аларга,
Күйпөлөктөйм: “Мага эмне?!”- деп теңелбей!

Көз каранды
болуп сага кайран жан,
Кадимкидей, башымды ийип, байлангам!
Кожойкеңер болсом дагы силердин,
Бөйпөңдөгөн кулуңарга айлангам!

Анткени издеп,
жүрсөм жалган дүйнөдөн,
Жүрөгүмө салып ийип дүрбөлөң,
Эстен кеткис ошол бир күн өзүңдөн(!)
Жүрөгүмдүн падышасы сүйлөгөн!

Ошол үндү угуш үчүн кайталап,
Күтүү менен жашап өтөм дүйнөдөн!..
Күтүү менен жашап өтөм, дүйнөдөн!..»

Жыпар Исабаева Открыть/Комментировать

2022-06-13 08:30:25 Байдылда деген Байдылда...

Байдылда деген Байдылда,
Нурунан күндүн, айдын да
Устукан алып жүргөнсүп,
Жаркырайт кыргыз айдыңда.

Туйлаган тулпар жалынан,
Сулуунун сүйкүм калынан -
Чууруган ырды таап алып,
Өткөрүп берчү канынан.

Ойлору суудай шар эле,
Ордосу айыл, шаар эле.
Адамды тек кой, макулук
Угууга сөзүн зар эле.

Күн - түндү билбей күйчү эле,
Жарыгы тегиз тийчү эле.
Булактар төшөп кулагын,
Балыктар сүйлөп ийчү эле.

Октолсо оттуу добушу,
Оронуп ырга конушу
Тарп чокуур тумшук ыр токуп
Безенчү карга, жорусу.

Бутаны мээлеп ата алган,
Адалдап "актан" тата алган.
Уюган балдай тилинен,
Булбул да келип бата алган.

Кырсыктын тийип кол учу,
Көрүндү белем жол учу...
Шум ажал өзү келбесе,
Эл - журту бербейт болучу.

Байдылда деген Байдылда,
Келет деп качан, кай жылда?..
Арманын уктум кусалуу
Тоо - таштын, өзөн - сайдын да.

Нурлан Калыбеков " Ирмемдер" китебинен.
Бишкек 2015 - жыл Открыть/Комментировать

2022-06-08 20:51:33 *АКЫНГА*

Не жоготтуң?.. Нени ичиңе батырдың?
Не түйшүгүн көрдүң чыккан жат ырдын?..
Жомок сындуу жашай албай жазганын,
Жолун улай албаган көп акындын.

Сенин жолуң куралат да, уланат.
Сезгенинен бир ыйлайт, бир кубанат.
Ойлобостур эч бир караан абалың,
Ошол күйүт өлгөндөн соң суралат...

Жалган дүйнө, жалган чыккан түбүнөн.
"Жазам чындык",- деп сендейлер күбүлөр...
Тапканыңдын бир аз бакты болсо да,
Тартарыңдын эки эселеп жүгү оор...

Бороон күнү канаттарың кыркылар...
Боздоп шондо дагы сенден ыр чыгат.
Бу турмуштун жамаймын деп жыртыгын,
Чындыкты таап, өз өзөгүң жыртылат.

А чындык не?.. Сендейлерге табылат.
Сезе билген сезимталга багы оор.
Туйбайт аны жөн адамдар сөзү жок.
Көрсөтсөң да, көрбөгөнү дагы оор!!!

Шул жолдордо өзүңдү өзүң жеп келдиң,
"Жакшы эле!"- деп дагы өзүңдү жектерсиң...
...сап чыгарчу сыя калем ордуна,
Сабын кармап кеткендигиң кетмендин.

Айтып алып, өз оюңдан чочулап,
Күйүү бакыт ушул жолдун отунан,
...деп, жан досуң – чылым салчу кутуча,
Желе үйлүү жөргөмүштүр кошунаң.(...)

Кайсыл багыт?.. Кандай менин жолдорум?
Кагаз угат, ыйлаганда көл болуп.
Калем менен, шул кагазга жөлөнүп,
Камыр жайган таяк турат өөн болуп...

Кайсыл багыт?... Кандай менин жолдорум?..

АЙНАРА БААТЫРБЕК КЫЗЫ
²⁷·⁰²·²² Открыть/Комментировать

2022-06-06 18:11:44 Ата тегин, атагын саткан жаман,
Ата журттан алыстап качкан жаман.
Жалпы элине дүрбөлөң күн түшкөндө,
Жаздыкка башын катып жаткан жаман.

Турмушуңа ташталган тузак жаман,
Туткундаган туура эмес кучак жаман.
Тилден бүткөн жоо болгон тагдырыңа,
Тирүүлүктө айтылган ушак жаман.

Анык эмес апыртма жалган жаман,
Абийири жок жылаңач калган жаман.
Сапатынан айрылып адам деген,
Сай сөөгүңдү сыздаткан арман жаман.

Ичи бузук арамза жандар жаман,
Ичип сөккөн атасын балдар жаман.
Ийгилигин каалабай келечектин,
Ит өлтүргөн ичине чалдар жаман.

Жакшылыкты жамандай көргөн жаман,
Жаатташтырып адамды бөлгөн жаман.
Жашоосунда жакшы сөз сүйлөй албай,
Жаман сөзгө көмүлүп өлгөн жаман!!!


МИРЛАН САМЫЙКОЖО. Открыть/Комментировать

2022-06-06 04:03:19 Жашалбаган жашоо кандай таттуу да,
Ыйланбаган көз жаш кандай таптаза.
Адам таппай жакшылыгын айтууга,
Балким мага эртең бирөө кат жазат.

Узун жазат, шашпай жазат жүрөктөн,
Сурайт менин ден соолугум, абалым.
Жооп жазыш үчүн балким сүрөттөп:
Бүгүн ооруп жатам, бүгүн жаманмын.

Ооруп атам, ооруп... Жалгыз башымы,
Батыра албай ушунча кең дүйнөгө.
Жалгыз туткан жалгыздыктан жашынып,
Олтурамын өзүмө өзүм сүйлөбөй.

Олтурамын сүйлөбөй да эстебей,
Эңшерилткен эски сүйүү кайгысын.
Мындан ары мындай улуу кек менен,
Мени Кудай менден гана айрысын

Менден гана... Башка эч качан, эч кимди,
Мага Кудай бербесин да албасын.
Мына дагы жүрөк согуп чечкинсиз,
Мына дагы түшүп барат кан басым...

Жашалбаган жашоо кандай таттуу да,
Ыйланбаган көз жаш кандай таптаза.
Адам таппай жакшылыгын айтууга,
Балким мага эртең бирөө кат жазат...

НАРСУЛУУ ГУРГУБАЙ Открыть/Комментировать

2022-05-31 19:56:26 ***

Талаа-түздү жортуп, дүйнө кыдырып,
Таңбы-кечпи чарчоо билбей жүгүрүп.
Шамал болгум келчү кээде, өзүмдүн
шагым сынса ким бирөөдөн түңүлүп.

Күйүт басса, күүгүм түшсө түнөрүп,
Күн менен түн түбөлүгүн тиленип.
Жердей болгум келчү кээде, жакшылар
жер кучактап өлсө күнү түгөнүп.

Түбү терең, уч-кыйырсыз тунарган,
Түндө тынчып, күндүз толкуп кубанган.
Көлдөй болгум келчү кээде, жалгыздын
көөнүн туюп, азап-ыйын угалган.

Өткөн-кеткен турмуш өкүт, же арман,
Өмүр - өкүм, тагдыр - сыноо, же жалган.
Тоодой болгум келчү кээде, кебелбей,
топук кылып бүт баарысын жеңе алган.

Акыйкатсыз заман турса эсти алган:
Ак-каранын тең ортосун кесе алган.
Жан болсом деп, туңгуюктан жолду таап,
Жарыктыктын табышмагын чече алган...

Бардын, жоктун сырын кесир билем деш,
Баары кыял, кыйын аны жүгөндөш.
Аалам түгөл, жериң бейиш болсо да,
Адамзаттын муң-арызы түгөнбөс.

Күндө өлүп, кайра таңда тирилем,
Күндүк өмүр эсебине жүгүнөм.
Жаратканды көктөн эмес ар таңда,
Жүрөгүмдөн тапканыма сүйүнөм.

Азыр жердин астын-үстүн болбостон,
Аман-эсен турганына сүйүнөм.

Акжол Доранбек уулу

2020 Открыть/Комментировать