2020-10-23 06:20:30
* * *
Бӯалӣ аз дасти туркон дар ба дар буд,
Кӯ ба кӯ буд,
Дар ҷаҳони танг ҳамчун фазлашон [1]
Бо ҷаҳолат [2], бо разолат [3] рӯ ба рӯ буд.
Лек боз аз дуру аз наздик
(Эй дунёи бӯқалмун, туфу бар гардиши ту!)
Бо ҳама лофу газоф [4],
Мерасад бар гӯши мо фарёду даъво
Аз куҷое фохирона, аз куҷое омирона [5]:
«Ҳаббазо! [6]
Бӯалӣ фарзанди мо буд.
Бӯалӣ сарманшаи[7] таърихи мо буд. Номи мо буд,
Нанги мо буд»...
Ҳоказою ҳоказо [8]...
Ман чӣ ҳам гӯям ба ин дарюзахоҳони бузургӣ,
Ки зи пуррӯӣ ҳама дар рӯ ба рӯи довари таърих
Ҳар замон
Таърихро таҳриф [9] месозанд.
Дар паноҳи як бузурги қавми дигар
Бенишониҳои худро дам ба дам
таъриф месозанд.
Мавлавиро турк мегӯянд,
Турк меноманд ҳам Зардуштро. Бӯалиро турк медонанд...
Аз эшон аҷаб нест,
Ки худоро низ рӯзе турк мехонанд...
Ман чӣ гӯям, баски ҳатто ноқисулақле [10] бидонад,
Ки паи даъвои Сино хилқати [11] синоӣ бояд,
Ки зи як модар ду фарзанд ояд эй бас,
Аз ду модар лек як фарзанд н-ояд!
Ҳар бузурге аввалан фарзанди як модар,
Ҳар бузурге аввалан фарзанди як халқ асту пас
Ифтихори ҷумла насли одам аст.
Пушкин аввал шоири рус асту баъд
Шоири Ғарб асту Шарқ асту тамоми олам аст!
Бӯалӣ ҳам пеш аз он, ки Бӯалӣ Сино шавад,
Тифли ду гаҳвора не,
Тифли як гаҳвора буд.
Бӯалӣ ҳам пеш аз он, ки нодири дунё шавад,
Кӯдаки як модари бечора буд.
Дидаи таҳқиқ [12] агар доред, хонед,
Гар намедонед то имрӯз, донед,
Номи ӯ Юлдуз куҷо?
Номаш Ситора будааст!
Кӯдаки Истора буд, ки рафт аз дунболи Хуршед [13],
Кӯдаки Истора буд, ки пар кушод
Дар фазои ҷовидон ҳамболи Хуршед.
Кӯдаки Истора буд, ки дар замин овора шуд,
Кӯдаки Истора буд, ки дар фалак Сайёра шуд!
“Боз як мушт” / Лоиқ Шералӣ / 26.10.1980
Дар Туркия китобе бо унвони «Буюк турк файласуфи ва тиб устоди ибни Сино шахсияти ва асарлари ҳақида тадқиқлар» чоп шудааст...Луғат:
1. фазл - бартарӣ, афзалият
2. ҷаҳолат - нодонӣ, бехабарӣ, ғафлат
3. разолат - пастӣ намудан, пастӣ, нокасӣ
4. гизоф - ҳарза, бефоида, беҳуда; беасос,
5. омирона - ба оҳанги амр, ҳокимона, ҳукмронона
6. ҳаббазо - (нидо) офарин, аҳсант
7. сарманшаъ - мабдаи асосӣ, сарчашма; сароғоз,боис ва оғозгар
8. ҳоказо ба ин тариқ, ҳамин хел, ба ин тартиб, ин тавр
9. таҳриф - вайрон кардани сухан; дуруст иваз кардани ҳарфҳо дар калима
10. ноқисулақл - ақлаш ноқис, ақлкӯтоҳ, камақл; нодон
11. хилқат офариниш, пайдоиш, ба вуҷуд омадан, сиришт
12. таҳқиқ - ҳақиқат кардан, тафтиш намудан; ҳақиқат ва воқеияти чизеро муайян кардан
13. хуршед - офтоб, меҳр, шамс
1.8K viewsedited 03:20