ЛОИК ШЕРАЛИ

2021-06-21 06:42:01 Таҳнияти устод Гулрухсор ба устод Лоиқ соли 1991. Ҷашни 50-солагии шоир!

#наворҳо Открыть/Комментировать

2021-06-13 07:50:06 * * *
Ғарқи дарёи ғамонам, роҳи ободӣ, куҷоӣ?
Як қалам шакку гумонам, роҳи ободӣ, куҷоӣ?

Гӯям ар, сӯзад забонам, варна сӯзад устухонам,
Дар замона безамонам, роҳи ободӣ, куҷоӣ?

Нашъаи суре намонда, ламъаи нуре намонда
Дар замину осмонам, роҳи ободӣ, куҷоӣ?

Мурдаҳо бегӯр монда, зиндаҳо бешӯр монда,
Хокдон шуд хонадонам, роҳи ободӣ, куҷоӣ?

Дурбину дурандешон ҳама бар хок рафтанд,
Ман барошон гӯрбонам, роҳи ободӣ, куҷоӣ?

Рӯзу шаб тобут бар дӯш, бори сад камбуд бар дӯш,
Сӯи гӯристон равонам, роҳи ободӣ, куҷоӣ?

Ҳар куҷо як муштзӯре, ҳар қадам сад қаҳрамоне,
Қаҳрамони бенишонам, роҳи ободӣ, куҷоӣ?

Ҳар куҷо соҳибкамоне, нест як соҳибқироне,
Дар камини сад камонам, роҳи ободӣ, куҷоӣ?

Хок шуд омоҷгоҳе, зиндагӣ шуд боҷгоҳе,
Сухраи суду зиёнам, роҳи ободӣ, куҷоӣ?

Як тараф дарюзаҷӯӣ, як тараф шерозаҷӯӣ,
Ман ғами дил мекашонам, роҳи ободӣ, куҷоӣ?

Гаҳ ба муши мурда рӯй орам, гаҳе бар гурбаи маст,
Асли худро менадонам, роҳи ободӣ, куҷоӣ?

Корвонҳо дур рафтанд, аз раҳи маъмур рафтанд,
Гарди роҳи корвонам, роҳи ободӣ, куҷоӣ?

Канда тори шоҳрудам, мурда ёри ҳамсурудам,
Ман дигар бо кӣ бихонам, роҳи ободӣ, куҷоӣ?

Ҳиммате, эй корвонкаш, то мабодӣ корвонкуш,
Аз ҳалокат деҳ амонам, роҳи ободӣ, куҷоӣ?

[01.02.1994]
#ғазалҳо Открыть/Комментировать

2021-06-12 05:20:05 * * *
Ҷаҳону зиндагонӣ бо ту зебад,
Суруру шодмонӣ бо ту зебад.
Ҷавонӣ кун, ҷавонӣ кун, ки имрӯз
Хушиҳои ҷавонӣ бо ту зебад.

#резаборон #дубайтиҳо Открыть/Комментировать

2021-06-11 12:52:01 * * *
Дар он соат, ки дилгирам, куҷоӣ, модари пирам?
Биё, бинмой тадбирам, ки дар гирдоби тақдирам.

Сарам хоҳад навозишҳои дастони туро имрӯз,
Дилам хоҳад нигоҳи гарми чашмони туро имрӯз.

Дилам хоҳад дуоятро –
Ду дастатро чу ду боли парастуҳо
Ба сӯи қибла бикшода,
Худоро аз фалакҳо бар замин хонда,
Гуселам кардаӣ бар роҳҳои дур,
Сипас аз пушти ман гирйистаӣ дар худ фурӯ монда...

Чӣ мепурсӣ?
Ту аз ман бештар медонӣ дунёрову қисматро,
Ту аз ман бештар медонӣ субҳу шоми давлатро.
Вале ман ҳар қадар аз ҳикмати дунё сабақ хондам,
Китоби куҳнаву навро чу болин зери сар мондам,
Фузун аз ту ҷаҳону зиндагониро надонистам,
Кашишҳои замину осмониро надонистам.

Надонистам, ки дар садсолагӣ ҳам боз
Ҳамчун кӯдаки парпеч хоҳам мурд,
Надонистам, ки баъди шири поки ту
Фақат афсӯс хоҳам хурд...

[1980]
#модарнома Открыть/Комментировать

2021-06-11 05:35:05 * * *
Ман дар дили дӯстон баҳор овардам,
Ман дар дили ошиқон хумор овардам.
Аз гумшудагони ишқ дар дашти фироқ
Пайғому дуруду ёдгор овардам.

#ҷомихайём #рубоиёт
Telegram | VK | TikTok | Instagram | OK | YouTube | Twitter | SoundCloud | LiveJournal | Открыть/Комментировать

2021-06-10 20:00:21 * * *
Дар қиёси гӯри мардон пештар
Гӯри занро жарфтар мекофтанд,
Гӯӣ ӯ дорад гуноҳони азим –
Аз шариат ҳилаҳо меёфтанд.

Гӯри занро жарфтар мекофтанд,
То гуноҳаш жарфтар пинҳон шавад.
То зи хоки ӯ нарӯяд сабзае –
Боиси маъсияти покон шавад.

Бехабар аз он ки зан модар бувад,
Ҷурмаш он бошад, ки инсон зодааст.
Бар чунон одатшиносони дурушт
Ӯ насиби зиндагонӣ додааст.

Бехабар аз он, ки модар холиқ аст,
Зиндагӣ ёбад аз ӯ такрорҳо.
Аз гуноҳи ҷумла фарзандони худ
Мекашад дар гӯр ҳам озорҳо...

Бехабар аз он, ки зан – ҷони ҷаҳон
Чашмашонро бар ҷаҳон бикшодааст.
Гар гуноҳе дорад, он ҳам ин бувад,
К-он чунон ноқадрдонон зодааст...

[1979]
#модарнома Открыть/Комментировать

2021-06-10 06:00:17 * * *
Дилам дарёст, соҳилҳо, куҷоед?
Дилам раҳҷӯст, манзилҳо, куҷоед?
Русуми дилбарӣ омӯхтам ман,
Шуморо ҷӯям, эй дилҳо, куҷоед?

#резаборон #дубайтиҳо Открыть/Комментировать

2021-06-09 17:45:09 * * *
То кай бувед аз ҳама дур, эй бародарон,
Гӯрӣ кунед то дари гӯр, эй бародарон!

Шохи ҷавонии шумо нашкаста, оваред
Баргу навои шодию сур, эй бародарон!

Аз ҷангуҷӯшу зӯрии ноҷоятон чӣ суд,
Чун нестед аз худо зӯр, эй бародарон!

Захма ба захми синаи хунин чӣ мезанед,
Созед торҳои дил ҷӯр, эй бародарон!

Бо чанд ҳарфи нарм зи аъмоқи ҷону дил
Гармо диҳед бар тани ур, эй бародарон!

Бо ормони равшану ояндабини хеш
Бино кунед ҳар дили кӯр, эй бародарон!

Он санги дил ба шишаи ин дил чӣ мезанед?
Иншо кунед маъбади нур, эй бародарон!

Узр оваред аз сари мардонагӣ яке
Озурдаед гар дили мӯр, эй бародарон!

Як шӯрабахт то шавад хушбахт, бигзаред
Аз ин ғиреву ғулғули шӯр, эй бародарон!

[02.02.1994]
#ғазалҳо Открыть/Комментировать

2021-06-09 12:41:01 * * *
Дареғу дард, ки ёрон зи мо ба дур шуданд,
Чунин зи кӯрии хешу зи бахти шӯр шуданд.

Чу иттиҳод набуда миёнашон чун мушт,
Ба сухра дастхуши чанд муштзӯр шуданд.

Ситорасӯхтагони диёри хуршедӣ
Ба ҳукми чанд камондори бешуур шуданд.

Ду чашм мунтазири илтифоти ёру диёр
Ба ёди хоки Ватан хун гириста кӯр шуданд.

Зи мавҷкӯҳаи Ому паи мадад аз мӯ
Убур карда бад-он сӯ, таҳи қубур шуданд.

Ба хоки ғайр надиданд хайру хайрият,
Ба хоки ғайр ғунуда, ғарибгӯр шуданд.

[05.02.1994]
#ғазалҳо
Telegram | VK | TikTok | Instagram | OK | YouTube | Twitter | SoundCloud | LiveJournal | Открыть/Комментировать

2021-06-09 06:39:53 * * *
Маро гум кардию дигар наёбӣ,
Хатамро дар ягон дафтар наёбӣ.
Биҷӯӣ сарҳисоби зиндагонӣ,
Валекин зиндагӣ аз сар наёбӣ.

#резаборон #дубайтиҳо Открыть/Комментировать