2022-04-15 09:00:09
ҚАРАҚАЛПАҚ ФИЛАРМОНИЯСЫ
(Өзбекстан мәмлекетлик филармониясы Қарақалпақстан Республикасы бөлими жәмәәтин бүгинги байрам менен қутлықлайман.)
Қәсийетли бул алтын ирге.
Мәдениятты таратар елге,
Ҳәр биринде өзгеше талант,
Хызмет етер көркем-өнерге.
Кеўли тасып, жүзлери жанып,
Бақсы айтар ҳәр сөзин анық.
Бүлбил сайрап турғандай бағда,
Қулағыңның қурышы қанып!
Қосық, нама – сезим дүньясы,
Илҳәм берер миллий мийрасы.
Әдеп-икрам нурларын шашқан,
Қарақалпақ филармониясы!
Йошлы нама жанды сөтеди,
Қус пәрўазы көкке жетеди,
Сазенделер сазын сазлаўдан,
Шаршағаның шығып кетеди.
Көз алдымда, қыял-ойым да.
Сән-салтанат байрам, тойымда,
Қулпы дөнип ашылған гүлдей,
Миллийлик бар аяқ-ойында!
Жигит-қызлар ойынға түсер,
Жас үлкенлер жаслығын еслер.
Кеўиллерде илҳәм оятар,
Бүлбил яңлы сайраған сеслер,
Устазлардың алтын уясы,
Мәнәўияттың қойыў саясы.
Мәртебели, татыў жәмәәт,
Қарақалпақ филармониясы!
Байжан УЗАҚОВ,
Нөкис қаласы.
@bayjan_uzaqov
5.6K viewsКадирбергенов Бахтияр, 06:00