2022-06-25 22:54:12
Tarixiy xotirasiz kelajak yo’q
Qariyb chorak asr avval Birinchi Prezident I.Karimov tomonidan aytilgan bu so’zlar hozirgi voqeliklarga ham mos bo’lib turibdi, zero tarixdagi amaliyotlarni qo’llab, yangi kelajak yaratish ostonasida turibmiz. Konstitutsiyaga o’zgartirish kiritish bo’yicha barcha amaliyotga boshchilik qilgan, tajribali professional mutaxassis Akmal Saidov ta’biridagi “Konstitutsiyaviy islohotlar sharpasi kezib yurishi”, bizga yaqin o’tmishda yuz bergan islohotlarni yodga solgan bo’lsa ajab emas.
Doimgidek, boshqa o’zgartirishlar ham taklif etilayotganligiga qaramay, muhokamalar markazini 90-modda egallab turibdi. Yodingizda bo’lsa, mamlakatni 27 yil uzluksiz boshqarib kelgan I.Karimov ham Konstitutsiyaga, aynan 90-moddaga bir necha bor o'zgartirishlar kiritish yo'li orqali prezidentlik lavozimini uzaytirgan, prezidentlikka to'rt marta qayta saylangan edi. Avvaliga 5 yil bo’lgan, keyin 7 yilga o’zgartirilib, 2011-yilda yana 7 yildan 5 yilga qaytarilgan prezident vakolat muddatini hech qancha muddat o’tmay yana 7 yillikka o’zgartirish taklif qilinyapti. Muddat atrofida shunchalik o’ralashib qolganimizdan xuddi shu moddadagi bir shaxsning ketma-ket ikki muddatdan ortiq nomzodini qo’yishi mumkin emasligi normasini unutayozibmiz .
Ushbu reformalarga doimgidek bosh-qosh bo’layotgan Akmal Saidovning e’tirof etishicha, Prezidentlik muddatini uzaytirish - xalq talabi va bu holatda u chorasiz, xalqning talabini bajarishga majbur. Menimcha, 11 yil avval ham xuddi shu xalq 7 yildan 5 yilga o’tkazishni talab qilgan va nega endi yana yuqoridagilarga noqulaylik keltirib, ortiqcha qog’ozbozlikni yaratib, eski raqamlarni qaytarmoqchi? Bizda barcha islohotlarning bosh tashabbuskori - shu xalqimiz, amaldorlar esa - xalq xizmatkori bo’lsa, “xizmatkor”dan bir ishni qayta va qayta qilishni talab qilish ham adolatsizlik menimcha.
Hozir biz chuqur eyforiya va dejavyu holatidamiz, bir tomondan o’zimiz talab qilgan lider 2036-yilgacha boshimizda quyoshdek turishi kafolatlanib turgan bo’lsa, ikkinchi tomondan, konstitutsiyaviy reformalar Birinchi Prezident davridagi eski O’zbekistonni eslatib turgandek. Eski tizimni tanqid qilish instrumenti bilan faoliyatini boshlagan hukumatning yana o’sha tizimga qaytayotgani ommada “oltin asr” sindromi (“синдром золотого века”) kuzatilayotganini anglatadimi? “Oltin asr”imizda ham tizgin hozirgi siyosatchilar qo’lida edi, menimcha, ular yangisini qurish imkonsiz bo’lganligi uchun eski qoliplardan foydalanishni ma’qul ko’rishdi shekilli. Barchani chulg’ab olgan “oltin asr nostalgiya”si Birinchi Prezidentning konstitutsion islohotlari xalq manfaatini o’ylab qilingan oqilona islohotlar ekanligini bugun isbotlab turibdi, va aminmanki, bugungi islohotlar ham xuddi shunday samara beradi. Umuman olganda, avval ham o’zgartirish kiritib yomon bo’lmadik va hozir ham yomon bo’lmaymiz.
Qo’ylar o’z podachisi kim bo’lishini tanlay olmaydi, qo’y bo’lgani uchun, biz - xalqmiz, o’z liderimizni 2036-yilgacha o’zimiz mustaqil tanlash huquqimiz bor. Shaxsan men shu xalq vakili sifatida eski O’zbekiston qoliplaridan holi haqiqiy Yangi O’zbekiston yaratilishiga ishonaman, buning uchun ishni avvalgi yillardagi xatoni tuzatib, muddatni 7 yilga qaytarishdan boshlash kerak, faqat beshinchi yili yuz bergan voqea takrorlanib, rejalar o’zgarib ketmasa bas.
Bizda hozir hech bo’lmasa, 2036-yilgacha Konstitutsiya tegilmasligiga kafolat bor.
P.S. Asosiysi, yurtimiz tinch, osmonimiz musaffoligicha qolsin. Qolgan barcha narsani o’zgartirsa bo’ladi :).
2.1K viewsedited 19:54
B
