2020-11-26 20:49:23
Кхин а, ас кху чохь дуккха а дийцина, вуьштта дуьхьал къамел деш а дийцина, хьалхо сайн цхьаьнца хилла къамел даладо ас юха а масалина, иштта и хаттар къуьйсуш, ас боху цуьнга, иза кхин шечунна тIера ца ваьлча: «Хьажахьа, оцу наха шаьш деш дерг ширк дац, мелхо а, иза мегаш хIума ду аьлла тоьшаллина далош дерг нийса дац аьлла цу нахана билгалдалур дарий хьоьга? Нагахь ахь ду бахахь, билгалдехьа суна», - аьлла, ширкаш дечара шайн тоьшаллаш лоруш далочу хIуманех пхи хIума схьадалий ас цунна, - «хIинца Iилманца билгалде суна хIара тоьшаллаш нийса цахилар», - аьлла. Царех цхьана тоьшаллах лаьцна а дан къамел ца хили цуьнан. Ас боху тIаккха: «Ахь муха до такфир, шаьш деш дерг ширк дац аьлла цара тоьшаллаш лоруш далош долу хIуманаш нийса цахилар хьайга билгалдалуш а доцуш?». «Уьш нийса даций хууш ма ду», - аьлла, хьекъале жоп дели цо суна! «Хьуна уьш нийса доций хиънера аьлла, дерриг дуьненна хаа деза аьлла ма дац, я хьуна а ма дац уьш цхьана дийнахь девзина, цхьана дийнахь нисвелла хьо а ма вац», - боху ас! Иштта хьал шегахь а долуш, стага муха до кхечунна такфир, со кхета а ца ло оцу хIуманах, цу стага деш дерг мел чIогIа ширк делахь а, цо «хIан-хIа, иза ширк дац» аьлла шен далош долу хIуманаш, уьш нийса цахилар Iилманца хьоьга бух охьабиллалуш боцуш, ахь цунна хьукма муха дийр ду?! И ас къамел динарг кхин генара Iилма долуш а вац, делахь а, и Iилма шайгахь ду бохучарех а ахь цхьаъ вийцахьа суна цу ширкаш дечарна юьхь дуьхьал охьа а хиъна, и хаттар дийцалур долуш. Ван а ма вац, даккхий къамелаш дахь а. Цара шайгахь дерг дийцина цхьа бутт баьлча, цхьанхьашхула хоьттуш а лелий, интернет чухула чекх а волий, тIаккха цара бохург нийса дац-м алало хьаьнгга а, амма юьхь дуьхьал охьа а хиъна къамел деш иштта хир ма даций. Кхин а, ахь цара далош долу далил бух болуш дац, кхуза догIуш дац аларх, хьо билгалдинарг лоруш ма вац, хIунда аьлча цо а ма бохий «хIан-хIа, ду иза иштта». ТIаккха шуьшиннах бакъ-харц муьлхург ван веза ладоьгIуш долу оха, масала? ТIаккха ахь, гуттар говза а хилла, Iеламнехан къамелаш далийча, хьенехо даIиф ду аьлла, вукхо кхин аьлла бохуш, я хьенехо хIара кхуза догIуш ду аьлла бохуш, тIаккха а ма вац хьо билгалдина лоруш, я хьужжат хIоттийна лоруш, хIунда аьлча цуьнан а ма бай хьуна дуьхьал бало Iеламнах, и хьадис сахьихь ду аьлла, я тоьшаллина дало мегаш ду аьлла, я иза цига догIуш ду аьлла а. Цундела хила дезарг Iилманан къамел ду. И муха дуй, хьадис даIиф ду ахь бахахь, ахь цунна цабезаш болу АлбанийгIара а я кхиберш а ца буьйцуш, иза даIиф хIунда ду, Iиллат хIун ю цуьнан, мичахь ю, матнангахь ю, рижалашкахь ю, санадехь ю, иштта и Iиллат ю аьлла Iеламнах муьлш бу, я нагахь дуьйцург и хьадис цига догIуш хилар, цахилар делахь, иза догIуш хилар кхечу тоьшаллица билгалдар, масала, КаIб вер дуьйцу хьадисехь, АллахIана а, Цуьнан Элчанна а зен деш ву иза аьлла Пайхамара, ткъа цигахь дерг хIун зен ду? Пайхамарна лер хилла, я еттар хилла, я барт бохор хилла, иза Iеламнехан дешнашца билгал ца до, мелхо а, оцу хьадисан кхечу риваятца, я ша и «зен» боху дош Къуръан чохь кхечанхьа а хьехийначехь лууш дерг хIун ду билгалдаьлла цхьа а меттиг юй, елахь, массо меттехь цхьана кепара билгалдаьлла, я бес-бесара даьлла, тIаккха цу юкъахь доьссинчу аятехь и дош хьахийна делахь, цигахь хилларг хIун хьал дар цу хенахь, муха зен дара цара Пайхамарна деш хилларг, къаринаташ олу-кх царех, уьш ерриге вовшах а тухий, билгалдо, иштта дIа дуккха а ду уьш. Хьо цхьаъ билгалдан чувахча, цу чуьра чучча кхечанхьахула дIайсавоьду, юхаван виц а луш дуккха а хIума ду цу юкъадогIуш. Вайна ма-моьтту тIеххулара дешнашца чекхдовлуш дац уьш, доккха Iилма ду иза, цундела Iеламстеган бен цу неIарх чукхийда йиш яц, кхийдаш волчо уггар хьалха Далла хьалха шена доккха жоьпалла тIеоьцу, дуьнен чохь доккха питана а до, ша а хьере хуьлий лела, юхаван некъ а ца карош!
990 views17:49