2021-03-09 10:13:42
Առաջնորդվելու ենք «Վե՛րջ անիշխանությանը» կարգախոսով… Նիկոլ Փաշինյանը մարտի 1-ին տեղի ունեցած հանրահավաքի ժամանակ խոսում էր ՛՛Վերջ թավիշին՛՛ կարգախոսի մասին:
Պետական կառավարումը թավիշային ընկալումներով, կարգախոսային մտայնությամբ առաջնորդվելու հետևանքով երկրում, ըստ էության, կառավարում չկա, անիշխանություն է:
Այսպիսի համոզման գալու համար պարտադիր չէ խորքային ուսումնասիրություն կատարել:
Նայեք Ձեր շուրջը՝ քաղաքը պարալիզացված է, մեծ ու փոքր, հնարավոր ու անհնար բոլոր հանցագործները վխտում են քաղաքում ու քաղաքից դուրս, պլաններ մշակում իշխանությունը վերցնելու, սպառնում, վախեցնում իրենց վերադարձով:
Մյուս կողմից՝ գեներալների հասկանալի դժգոհությունը, հասարակության անորոշությունն ու հիասթափությունը, ապագայի նկատմամբ որևէ հույս չտեսնելու ողբերգությունը, Ալիևի ցինիզմն ու դրա նկատմամբ իշխանության ամորֆ վերաբերմունքը, պետական կառավարման համակարգի ցածր արդյունավետությունը բավարար են, որպեսզի մարդիկ շատ բան հասկանան, որ, այնուամենայնիվ, ինչ-որ բան այն չէ ու սխալ է:
Ուրեմն եթե կարգախոսներով ենք հանդես գալիս, պատմական այս ժամանակահատվածում ամենաճիշտ կարգախոսը պետք է լինի ՛՛Վերջ անիշխանությանը՛՛՛:
Հայաստանում պետք է գործի ուժեղ, ազդեցիկ, խոսքի ու գործի իշխանություն՝ վերջ տալու այս թավիշին ու անգործությանը:
Մարդիկ պետք է տեսնեն ու զգան, որ իշխանությունը գործում է, որ օրենքը գործում է, որ երկիրը սկսում է մտնել բնականոն զարգացման հուն, որ տնտեսությունը սկսում է աճել:
Ես զգուշացնում եմ՝ եթե Հայաստանում հանցագործները գան իշխանության, մեղավորն այս իշխանությունն է լինելու, որովհետև իմ պատկերացրած երկրում հանցագործի տեղը բանտն է:
Եթե օրվա իշխանությունը հանցագործին չի պատժում, ավելի՛ն, իր անգործությամբ թույլ է տալիս, որ հանցագործը գա իշխանության, ուրեմն ինքն առնվազն իր անգործությամբ նպաստել է այդ հանցագործների գործունեությանը:
Վե՛րջ ենք տալու այս անիշխանությանը և այսուհետ առաջնորդվելու ենք ՛՛Վերջ անիշխանությանը՛՛ կարգախոսով:
743 views07:13