2024-05-06 15:58:50
အင်ဂျန်းယန်မြို့နယ် နလော့၊ ဇန်နောင် မေခမြစ်ကမ်းတစ်လျောက်တွင် KIA/ KIO လက်နက်ကိုင်အဖွဲ့မှ စက်ယန္တရားကြီးများဖြင့် အကြီးစား ရွှေတူးဖော်မှုများပြုလုပ်လာ
မြစ်ကြီးနား၊မေ -၆ (၂၀၂၄)
ကချင်ပြည်နယ်၊ အင်ဂျန်းယန်မြို့နယ်၊ နလော့ကျေးရွာနှင့် ဇန်နောင်ကျေးရွာအနီးရှိ မေခမြစ်ကမ်းဘေးတစ်လျောက်တွင် KIA/ KIO လက်နက်ကိုင်အဖွဲ့အစည်းမှ စက်ယန္တရားကြီးများဖြင့် အကြီးစား ရွှေတူးဖော်မှုများကို ဧပြီလအတွင်းကစ၍ ပြုလုပ်နေကြောင်း ဒေသခံများထံက သိရသည်။
ချီဖွေမြို့နှင့် ငါးမိုင်ခန့်အကွာ မေခမြစ်တစ်ဖက်ကမ်း နလော့၊ ဇန်နောင်ကျေးရွာတို့တွင် KIA/ KIO လက်နက်ကိုင်အဖွဲ့အစည်းက ဦးစီး၍ နေ့၊ ညမပြတ် စက်ယန္တရားကြီးများဖြင့် အကြီးစား ရွှေတူးဖော်ခြင်းတို့ကို ပြီးခဲ့သည့် ဧပြီလအတွင်းက စတင်လုပ်ဆောင်နေကြောင်း ဒေသခံများက ပြောသည်။
" ဒီနှစ် ဧပြီလဆန်းပိုင်းကနေ စပြီး ချီဖွေမြို့ရဲ့ တစ်ဖက်ကမ်း နလော့ရွာနဲ့ ဇန်နောင်ရွာဘက်တွေမှာ အကြီးစား ရွှေတူးဖော်တာတွေ လုပ်နေကြတယ်။ KIA က ဦးစီးပြီးတော့ လုပ်နေတာ ဟုတ်တယ်။ ဘယ်သူမှ မတားရဲဘူး။ မြစ်၊ ချောင်းတစ်လျှောက်မှာလည်း အကုန်ပျက်စီးကုန်ပြီ။ မိုးရာသီ ရောက်လာရင်တော့ ဒေသခံပြည်သူတွေ ဒုက္ခရောက်ကြတော့မယ် " ဟု အမည်မဖော်လိုသူ ဒေသခံများက ပြောပြသည်။
အင်ဂျန်းယန်မြို့နယ် အတွင်းရှိ တပ်မတော်စခန်းများမှ KIA/ KIO လက်နက်ကိုင်အဖွဲ့နှင့် တိုက်ပွဲဖြစ်ပွားခြင်းမရှိပဲ နောက်ဆုတ်ပေးခဲ့သည့်အတွက် လက်ရှိအချိန်တွင် KIA/ KIO အဖွဲ့သည် ၎င်းတို့၏ နယ်မြေအဖြစ် သတ်မှတ်ကာ ဒေသခံပြည်သူများကို လူသစ်စုဆောင်းခြင်း၊ ဆက်ကြေးကောက်ခံခြင်းများ ပြုလုပ်နေသည့်အပြင် စစ်သင်တန်းကျောင်းကိုလည်း ဖွင့်လှစ်သင်ကြားနေပြီး၊ ၎င်းတို့၏ တပ်မဟာစခန်း အထိုင်ချရန် စီစဉ်လျက်ရှိကြောင်း ခိုင်လုံသည့် ဒေသခံ သတင်းရင်းမြစ်ကဆိုသည်။
" အဲ့ဒီနယ်မြေက သူတို့ရဲ့ ဒုတိယလိုင်ဇာလို သဘောထားလာတယ်။ တူးဖော်မှုတွေကို အကြီးအကျယ်လုပ်နေတယ်။ စစ်သင်တန်းကျောင်းတွေ ဖွင့်လာတယ်။ သယံဇာတ တူးဖော်လို့ရတဲ့ ငွေတွေ၊ ဆက်ကြေးကောက်လို့ရတဲ့ ငွေတွေနဲ့ လက်နက်ခဲယမ်း စုဆောင်းတာတွေ လုပ်နေကြတယ်။ ပြီးတော့ KIO/ KIA အစိုးရပိုင် နယ်မြေပုံစံ ပုံဖော်လုပ်ဆောင်တာတွေ ရှိနေတယ်" ဟု ၎င်းကပြောသည်။
အဆိုပါ အင်ဂျန်းယန်မြို့နယ်အား သက်ဆိုင်ရာတာဝန်ရှိ အဖွဲ့အစည်းများက တင်းတင်းကြပ်ကြပ် ကန့်ကွက်တားမြစ်ခြင်းမျိုး မပြုလုပ်ပါက KIO/ KIA လက်နက်ကိုင်အဖွဲ့သည် ချီဖွေ-မြစ်ကြီးနား သွားလမ်းအား ထိန်းချုပ်လာနိုင်ဖွယ်ရှိပြီး၊ လက်ရှိအစိုးရ ယန္တရားလည်ပတ်မှုလုပ်ငန်းကိစ္စရပ်များအား အဖျက်အမှောက် ကြီးကြီးမားမား ပြုလုပ်လာနိုင်ဖွယ်ရှိကြောင်း ချီဖွေမြို့နေသူ ရပ်မိ၊ ရပ်ဖ ဒေသခံများက သုံးသပ် ပြောဆိုသည်။
အလားတူ KIO/ KIA လက်နက်ကိုင်အဖွဲ့သည် ကချင်အထူးဒေသ(၁) နယ်မြေများဖြစ်သည့် ကံပိုင်တည်၊ ချီဖွေ၊ ဖီမော်၊ ဆော့လော်၊ ဖရဲ စသည့် ဒေသတို့တွင်လည်း တပ်စခန်းချ၍ ဆက်ကြေးကောက်ခံခြင်း၊ လူသစ်စုဆောင်းခြင်း ကဏ္ဍများကိုလည်း ယခုနှစ်ပိုင်းအတွင်း တွင်တွင်ကျယ်ကျယ် လုပ်ဆောင်လာကြောင်း သိရသည်။
#PeopleMedia
31.6K viewsKyaw Soe Oo, 12:58
P
