2021-05-23 20:26:06
ŞƏVVAL AYI İLƏ BİR ÖMÜRLÜK SAVAB
Hicri təqviminə görə Mübarək Ramazan ayı bitdikdən sonra Şəvval ayı gəlir. Şəvval ayı qəməri aylardan onuncusudur. Bu ayda oruc tutmaq qədim zamanlardan bu günümüzə qədər müsəlmanlar tərəfindən sevilən bir əməl olaraq gəlib çıxmışdır. Ramazan ayı boyunca oruc tutmağa vərdiş edən insanlar, Şəvval ayında da altı gün oruc tutmağa böyük maraq göstərmişdirlər. Əlbəttə bu maraq boş yerə deyildir. Belə ki, Peyğəmbərimiz (Allahın Ona salamı olsun) Ramazandan sonra Şəvval ayında oruc tutanın “bir il oruc tutmuş kimi” savaba nail olacağını bildirmişdir. Buna görə də, Ramazanda bir ay oruc tutanlar, Şəvval ayında altı gün oruc tutmaqla “bütün ili oruclu keçirmək” savabını əldən vermək istəməmişlərdir. Bu mövzuda aşağıdakı hədisləri xatırlada bilərik:
Allah Elçisi (Allahın ona salamı olsun) belə buyurmuşdur: “Kim Ramazan ayında oruc tutsa, sonra Şəvval ayının altı gününü də buna əlavə etsə, il boyu oruc tutmuş kimidir”. (Səhih Muslim, 1164.)
Səhabələrdən birisi belə rəvayət edir ki, Allah Elçisinin belə buyurduğunu eşitdim: “Allah hər bir yaxşı əmələ görə on qat mükafat verir, bir ay (Ramazan) on aya bərabərdir. (Ramazan) ayından sonra altı gün oruc tutmaq isə ili tamamlayır”. (İbn Xuzeymə, 2115.)
Hədislərdən onu başa düşürük ki, bir ay Ramazan orucundan sonra, Şəvval ayında da altı gün oruc tutaraq oruc sayını otuz altıya (36) çıxaran birisi bütün ili oruclu keçirmiş kimi savab qazanmaqdadır.
Alimlərimiz “bütün ili oruclu keçirmiş kimi” savab qazanmağı belə izah edirlər: "Hər il Ramazan ayının və Şəvval ayının altı günü orucunu davamlı tutan birisi, ömrü boyu oruc tutmuş kimi olar."
Bu necə olur?
Ramazan ayı boyunca oruc tutan bir insan hər tutduğu oruca görə on savab qazanmışdırsa, bunun hasili üç yüz (300) savab edər. Şəvval ayında tutduğu altı gün orucu da hər birini on savabdan hesabladığımız zaman, altmış (60) savab edər. Ramazan orucu və Şəvval ayı orucunun savablarını cəm etdiyimiz zaman isə, bu üç yüz altmış, yəni qəməri təqvimə görə bir il edər (300+60=360).
Beləliklə, hədisdə gizlənmiş sirri görmüş oluruq. O kəs, bütün ili oruclu keçirmiş kimi mənəvi biz qazanc, savab əldə edə bilər. Şəvval ayında olan orucun hikməti budur ki, Ramazan ayında fərz orucları əsnasında bizdə bəzi xətalar, qüsurlar və s. baş verir. Bu oruc, fərz namazlarına bağlı olan sünnə, nafilə namazlarına bənzəyir. Nafilə namazları – fərz namazlarındakı bəzi naqislikləri düzəldə bildiyi kimi; fərz və sünnə namazlarında etdiyimiz xətaları, nöqsanlıqları – səhv səcdəsi aradan qaldıra bildiyi kimi, Şəvval orucu da Ramazan orucundakı naqislikləri aradan qaldıra bilər.
Şəvval orucu necə tutulur?
Ramazan bayramı (namazı) Şəvval ayının birinci günündədir. Buna görə də, Şəvval ayının ilk günü oruc tutulmaz, çünki bu gün bayramdır və bayram günü oruc tutmaq icazəli deyildir, haramdır. Şəvval ayının ikinci günündən başlayaraq növbəti ay olan Zilqadə ayı daxil olana qədər altı gün oruc tutmaq olar.
Şəvval orucunu ard-arda tutmaq lazımdır?
Bu orucu ard-arda tutmaq şərt deyildir, fasilə verərək də tutmaq olar. Əsas odur ki, Şəvval ayı daxilində olsun.
Ramazan qəza orucları olanlar Şəvval orucu tuta bilər?
Bundan əlavə, Ramazan ayından qəzası olanlar varsa, ilk öncə bu qəzalar tutulmalıdır, daha yaxşı olan budur. İlk öncə borcdan, qəzalardan qurtulmağı düşünmək yerinə düşər. Ancaq kimsə, “qəzaları sonra da tuta bilərəm” – deyə düşünə bilər. Bu seçim məsələsidir. Hər iki fikir də icazəlidir.
Bəyyinə | t.me/beyyinetv
211 views17:26
B
