2022-08-28 12:12:59
Ուրեմն՝ այսպես․ Մեղրիով դեպի Նախիջեւան ավտոմայրուղու նախագիծը մշակվել է դեռեւս ԽՍՀՄ գոյության տարիներին, երբ Հեյդար Ալիեւը ոչ միայն ԽՄԿԿ Քաղբյուրոյի անդամ, այլեւ, ներկա տերմինաբանությամբ ասած՝ Խորհրդային Միության առաջին փոխվարչապետն էր եւ վերահսկում էր մի շարք, այդ թվում՝ ռազմավարական նշանակության ենթակառուցվածքների ոլորտը։ Բաց աղբյուրներից հայտնի է, որ այդ ծրագիրը կյանքի չի կոչվել բացառապես ՀԿԿ ԿԿ առաջին քարտուղար Կարեն Դեմիրճյանի անձնուրաց դիմադրության պատճառով։ Հիմա նայենք անկախության շրջանը։ Հեյդար Ալիեւը Ադրբեջանում իշխանության է վերադարձել 1993թ․, մեկ տարի անց Ադրբեջանը Լեռնային Ղարաբաղի հետ ստորագրել է հրադադարի անժամկետ համաձայնագիր։ 1997թ․ տարեվերջին, 98-ի հունվարին Հայաստանում տեղի է ունենում նախ՝ փաստացի, ապա՝ ֆորմալ ձեւակերպում ստացած իշխանափոխություն։ Մերժվում է ԼՂ կարգավորման մի տարբերակ, որտեղ ոչ մի խոսք չկա Ադրբեջան-Նախիջեւան ուղղակի եւ անարգել հաղորդակցության մասին, իսկ Ադրբեջանը համաձայնում է հայկական զինուժի հսկողության տակ թողնել նախկին ԼՂԻՄ-ի եւ Լաչինի շրջանի ամբողջ տարածքը՝ ավելի քանի 6 հազար քառակուսի կիլոմետր։ Այդ ծրագիրը ձախողելուց մեկ տարի անց Հայաստանը եւ Ադրբեջանը քննարկում են ,,տարածքների փոխանակման,,՝ ավելի ստույգ՝ Մեղրիի շրջանը Ադրբեջանին հանձնելու դիմաց ԼՂԻՄ-ը Լաչինի միջանցքով Հայաստանին միավորելու, իսկ հետո՝ ,,սուվերեն,,՝ ,,Մեղրիի միջանցքը,, Լաչինի միջանցքով փոխանակելու տարբերակը։ 2011թ․ Կազանի փաստաթղթում արդեն հստակ արձանագրվում է, որ Հայաստանը երաշխավորում է Ադրբեջան-Նախիջեւան ,,ուղղակի ցամաքային անարգել հաղորդակցությունը,,։ Այսօր երկու տասնամյակ Հայաստանում իշխած եւ Մեղրիում Ադրբեջանին Նախիջեւանի հետ ,,ուղղակի ցամաքային անարգել հաղորդակցություն,, երաշխավորած քաղաքական ուժերը գործող իշխանությանը մեղադրում են ,,թուրք-ադրբեջանական տանդեմի շահերը սպասարկելու,, մեջ։ Հետաքրքիր է, նրանք ինչպե՞ս են բացատրում կարգավորման 1997թ․ ծրագրի տապալումը, ծրագիր, որ կյանքի կոչելու դեպքում Հայաստանը ընդմիշտ ազատվում էր Մեղրիով Նախիջեւանի հետ Ադրբեջանին ուղղակի, ցամաքային անարգել հաղորդակցություն ապահովելու՝ դեռեւս ԽՍՀՄ ժամանակներից նրան պարտադրվող աշխարհաքաղաքական թակարդից։ Հիմա ովքե՞ր են ,,լեյտենանտ Շմիդտի որդիները,,։
Վահրամ Աթանեսյան
1.8K views09:12