Москубаҕа "Лужники" стадиоҥҥа Бүтүн Россиятааҕы I күүстээхтэр спартакиадаларыгар оҕунан ытыыга хамаанданан киирсиигэ кыргыттарга Саха сирин охчуттара Кристина, Розалина Тимофеевалар уонна Рената Гаврильева үрүҥ көмүс мэтээли ылары ситистилэр.
Кинилэр финал аҥарыгар Бурятия кыргыттарын хоттулар. Онтон кыһыл көмүс мэтээл иһин быһаарыылаах ытыыларга Москуба хамаандатыгар 27:26 хоттордулар.
Кристиналаах, Розалина дойдубут бастакы улахан спартакиадатыгар ситиһиилээхтик кыттан абаҕатыгар, эһэтигэр, тренердэригэр Анатолий Тимофеевка улахан, үчүгэй бэлэҕи оҥорон үөртүлэр.
Санатан эттэххэ, Анатолий Николаевич бу күннэргэ 65 сааһын туолар. Балаҕан ыйын 3 күнүгэр өрөспүүбүлүкэ бастыҥ охчуттара СӨ үтүөлээх тренерин, убаастыыр киһилэрин эҕэрдэлии Бэрдьигэстээх ипподромугар түмсэннэр, бастыҥ ааты былдьаһыахтара.
Улууспут олохтоохторун сытыы киирсиилэри көрө кэлэргитигэр ыҥырабыт.
Вячеслав Алексеев.
