2021-03-19 06:19:31
Чин
Анафематствований в неделю Торжества ПРАВОСЛАВИЯ
1. Отрицающим бытие Божие и утверждающим, яко мир сей есть самобытен, и вся в нем без промысла Божия и случаю бывают, анафема (трижды).
2. Глаголющим Бога не быти Дух, но плоть; или не быти Его праведна, милосерда, премудра, всеведующа, и подобная хуления произносящим, анафема (трижды).
3. Дерзающим глаголати, яко Сын Божий не единосущный и не равночестный Отцу, такожде и Дух Святый, и исповедающим Отца, и Сына, и Святаго Духа, не Единаго быти Бога, анафема (трижды).
4. Безумие глаголющим, яко не нужно быти ко спасению нашему и ко очищению грехов пришествие в мир Сына Божия во плоти и Его вольное страдание, смерть и воскресение, анафема (трижды).
5. Не приемлющим благодати искупления Евангелием проповеданнаго, яко единственнаго нашего ко оправданию пред Богом средства, анафема (трижды).
6. Дерзающим глаголати, яко Пречистая Дева Мария не бысть прежде рождества, в рождестве и по рождестве Дева, анафема (трижды).
7. Не верующим, яко Дух Святый умудри пророков и апостолов, и чрез них возвести нам истинный путь к вечному спасению, и утверди сие чудесами, и ныне в сердцах верных и истинных христиан обитает и наставляет их на всякую истину, анафема (трижды).
8. Отмещущим безсмертие души, кончину века, суд будущий и воздаяние вечное за добродетели на небесех, а за грехи осуждение, анафема (трижды).
9. Отмещущим вся таинства святая, Церковию Христовою содержимая, анафема (трижды).
10. Отвергающим Соборы святых отец и их предания, Божественному откровению согласная и Православно-кафолическою Церковию благочестно хранимая, анафема (трижды).
11. Помышляющим, яко православнии государи возводятся на престолы не по особливому о них Божию благоволению, и при помазании дарования Святаго Духа к прохождению великаго сего звания в них не изливаются; и тако дерзающим противу их на бунт и измену, анафема (трижды).
12. Ругающим и хулящим святыя иконы, ихже святая Церковь ко воспоминанию дел Божиих и угодников Его, ради возбуждения взирающих на оныя ко благочестию, и ко оных подражанию приемлет, и глаголющим оныя быти идолы, анафема (трижды).
13. Теософам, еретикам, дерзающим глаголати и пребезумне учити, яко Господь наш Иисус Христос не единожды на землю сниде и воплотися, но множицею воплощашеся, такожде и отрицающим, яко истинная премудрость Отчая есть Сын
Его Единородный и вопреки Божественному Писанию и учению святых Отец ищущим иныя премудрости, анафема (трижды).
14. Масонам, оккультистам, спиритам, чародеям и всем, иже не Единому Богу веруют, но чародейным бесов призыванием грядущее ведети тщатся, анафема (трижды).
15. Отступающим от Православныя веры и приемлющим иныя исповедания на соблазн братиям нашим и отпадающим в раскол, анафема (трижды).
16. Богопротивным человеком злым, дерзнувшим даже и на убиение Помазанника Божия святаго Царя-мучениках, анафема (трижды).
17. Гонителем Христовыя Церкве, нечестивым отступником, подъявшим руки на священнослужителей Божиих, поправшим святыни, разрушившим храмы Божий, истязующим братию нашу и осквернившим Отечество наше, анафема (трижды).
18. Нападающим на Церковь Христову и учащим, яко она разделися на ветви, яже разнятся своим учением и жизнию, и утверждающим Церковь не Едину сущу видиму быти, но от ветвей, расколов и иноверии соединитися имать во едино тело; и тем, иже не различают истиннаго священства и таинств Церкве от еретических, но учат, яко крещение и евхаристия еретиков довлеют для спасения; и тем, иже имут общение с сими еретики или пособствуют им, или защищают их новую ересь экуменизма, мняще ю братскую любовь и единение разрозненных христиан быти, анафема (трижды).
19. Предтечам и слугам антихриста; нечестивым и отступникам, проповедующим и поучающим, яко же принятие числа имени антихриста вместо святаго имени есть деяние не греховное и не вероисповедальное и оной ересью соблазняющим и прельщающим православных христиан в отступление от истиннаго Господа и Бога и Спаса нашего Иисуса Христа, анафема (трижды).
151 views03:19