БИЗНЕС ТРЕНИНГЛАР ЁҲУД АЛЛАЧИЛАР САНАТОРИЯСИ Охирги вақтларда | Shaydoi Jannat

БИЗНЕС ТРЕНИНГЛАР ЁҲУД АЛЛАЧИЛАР САНАТОРИЯСИ

Охирги вақтларда ижтимоий тармоқлар "аллачилар"нинг видеолари билан тўлди. Қандайдир мақол ёки афоризм, ҳикояни мусиқа фони остида гапириш - ўзбек сегментида трендга айланган.

Негадир бизда жамият ҳам Россиянинг изидан юраётгандек туюлади. Бундан 10-15йил аввал Россияда "MMM" тармоқли маркетинги миллионлаб одамларнинг пулини фириб йўли билан ўзлаштирганди.
Бир неча йил ўтиб ўзимизда шунга ўхшаш корхоналар иш бошлади.

9-8йил олдин Россияда аудиокитоб орқали тил ўрганиш жуда машҳур бўлди. Ваҳоланки, АҚШ ҳарбийларга бу усулда тил ўрганиш методикасини 1950-1960 йилларда жорий қилган ва кейин бутунлай самарасиз деб, бекор қилинган эди.
Бизда бундай китоблар карантин вақтида жуда оммалашди.

Бундан 7-6йил олдин Россияда бизнес тренинглар жуда оммалашди. Одамлар латифа ёки ҳикоя, "алла" эшитиш учун катта пул тўлаб, залларни тўлдирди. Аммо ҳозир уларнинг бетига бит ҳам қарамай қўйди. Аммо бизда алла-бизнеси сўнгги 2 йилда оммалашди.

Сиз бундан кейинги трендлар ҳақида қизиқябсизми?

Ҳозирда Россияда фитнес-блоглар трендда. Қад-қоматли йигит ва қизлар ТТ, озиш ва саломатлик борасида тавсиялар бермоқда. Ўз вебинар-у китобларини пулламоқда.

Яна бири - трейдинг! Унда трейдер биржани "анализ" қилиб, қайси акция орқали кўп даромад кўришни айтиб, инсонлардан пуллар олмоқда.
"Бу нарса 2ойдан сўнг шунча нархга ошади. Сен 2000$ берсанг, 2ойдан сўнг 6000$ бўлади. 50/50 қиламиз. Анализ мендан, сармоя сендан" деб, ваъдалар беришади.

Кўп ўтмай шуларни бизда ҳам кўрасиз.

*

ТРЕНИНГЛАР НИМА УЧУН КЕРАКСИЗ?

Улар ўзларини муваффақиятли бизнесмен сифатида кўрсатади. Миллион долларлик фойдалар ҳақида гапиради.

У доим фойда ҳақида гапиради, руҳлантиради. Лекин солиқ тизими, солиқларни тўлаш ва ундаги икир-чикирлар, рекетлар, "доля"талаблар, соҳа монополлари ва бошқа чиркин жиҳатлар ҳақида сўз очмайди.

Маркетинг ва унинг турлари (Digital, SEO, Sarafan, Nova) ҳақида соатлаб айтиб беради. Чет элдаги таниқли бизнес эгалари ҳаётидан мисоллар келтиради. Аммо ишонинг - Шарқ ҳеч бир маркетинг қоидаларини тан олмайди!

*

Маркетолог бўлиб иш бошлаган кезларим маркетингга оид китобларни кўп ўқирдим. Илк бор амалда қўллаш саҳнаси ажиб бўлган:

Мен ва рақобатдош корхона - иккимиз бир мижоз олдига келганмиз. Мен башанг кийинган, қўлимда каталог, нутқим равон. Рақобатчим эса кўча кийимида, қўлида нарх-наво ёзилган биргина қоғоз, ўзидан сигарет анқиб турарди.
Мижоз иккимизни тинглагач, охирида $1.5млнлик маҳсулотни ундан оладиган бўлди.

Сабаби у "откат" таклиф қилган эди. Мени маҳсулотим арзон ва сифатли бўлса ҳам, у пул айлантириб берувчи корхона билан шартнома имзолади. Мана сизга бижитал-мижитал маркетинг!

Бундай ҳолат ҳақида деярли ҳамма эшитган!

Ана шундан сўнг маркетингга оид китобларни улоқтириб юборганман!

*

Энди бизнес қилмоқчи ёки бошлаган инсонларни шундай аллачиларга анграйишини кўриб ачинаман.

Уларни оят ва ҳадислардан мисол келтириши, саҳобаларнинг тадбиркорлиги ҳақида айтиб, Ислом орқали одамларнинг қалбига ўрмалаши эса энсамни қотиради.

*

Бироз танқид қилсангиз "У дин ва дунёвий жиҳатдан ўргатади. Сен нимани ўргатасан?" деб, қопувчи муридлари ҳам бор.

"Эҳсон мукофоти - фақат эҳсон!"

Агар бойимоқчи бўлсангиз - ана шу тренингларга кетадиган пулни эҳсон қилинг, ота-онангизга едириб, дуосини олинг. Аллоҳ ишингизга барака беради.

Мана сизга дин томонлама ёндашув!

*

Бизнес қилмоқчимисиз?

Шу соҳани таҳлил қилинг: рақобат ва солиқ қандай? Қанча билан бошланади? Мижозлар базаси қандай шакллантирилади? Бозорга қандай кирилади?
Тажрибадорга шогирд тушинг ёки ишчи бўлинг, ўрганинг.

*

Аллани мотивация деб, ўзингизни авраманг! Мисол қилиб кўрсатилган Жек Ма, Илон Маск ва ўзгалар тренингларга қатнашиб бойимаган!


*

"Ойига 1000$ топишни ўргатаман. Нархи 10$" деган эълонга 100та ҳаридор чиқади.

Залда спикер "Сизлар 10$дан тўлаб кирдингиз. 100х10$=1000$ бўлади. Дарсимиз тугади!" деб, фириб қилиш аллачиларга қараганда ҳаққонийроқ ўзи...

Shaydoi Jannat

@eslatdim