МИЛЛАТЧИ МУСУЛМОНЛАР УЧУН Изоҳлар орасида айримларнинг 'фалон | Shaydoi Jannat

МИЛЛАТЧИ МУСУЛМОНЛАР УЧУН

Изоҳлар орасида айримларнинг "фалон миллатга мансубда, шу боис шундай" қабилида ҳақоратомуз сўзларига кўзим тушади.

Қайсидир қавм хато қилса даставвал унинг миллати саваланади, сўнг диний қарашлари.

*

Салоҳиддин Айюбий курд,
Муҳаммад Фотиҳ турк,
Ториқ ибн Зиёд барбар миллатига мансуб эдилар.

Имом ал-Бухорий бухоролик,
Имом Муслим нишопурлик,
Ибн Можа қазвинлик,
Имом Термизий термизлик,
Имом Насоий туркманистонлик эдилар.

Ислом араблардан бошлансада, унинг шиддат олиши бошқа халқлар билан боғлиқ бўлди.

*

"Арабнинг араб бўлмагандан ҳеч бир устунлиги йўқдир, илло тақвоси билан!"

(Саҳиҳ)

*

Аллоҳ Қиёматда амалларимизни сўроқ қилади, миллатимизни эмас.

Араб бўлган Абу Лаҳаб Жаҳаннамда-ю, Билол Ҳабаший (розияллоҳу анҳу) Жаннатда.

*

Исломдан аввал ҳам миллатчиликдан келиб чиққан урушлар кўп бўлган.
Аммо Ислом бу урушларга чек қўйди.

Мусулмонлар Иброҳим алайҳиссалом миллатига мансуб дея, юқори шарафга кўтарилдилар.

*

Эсланг, авваллари ўзбек, тожик, қозоқ, қирғиз ёки туркман каби атамалар бўлмаган.

Барча ўз тилида сўзлашар, аммо бир-бирини тушуниши учун ҳеч қандай таржимоннинг кераги йўқ эди.

Қадрият, урф-одатлар ҳам бир-биридан деярли фарқ қилмайди.

Аммо қаердандир коммунизм деган тизим келди-ю, барчамизни бўлиб юборди.

Ерларимизни қайта тақсимлаш давоси билан чиқиб, кўплаб хақларни жойидан кўчириб юборди.

Келажакда фикр юритувчилар халқни бирлаштиришидан қўрқиб, чегара сарҳадларини чизиб, ўзаро иғво уруғларини ҳам экиб кетдилар.

*

Биродарларим!

Ёмон миллат бўлмайди, ёмон иллат бўлади!

*

Ўрта Осиёнинг қай ҳудудига бормай, ўзимни уйимдагидай ҳис қиламан.
Чунки қардошларимнинг уйида меҳмон эканимни жуда яхши англайман.

Қардошларимиз билан суҳбатлашар эканман, доим бир нарса ўз тасдиғини топаверади:

Бизга

Қозоқларнинг бирдамлиги,
Тожикларнинг шиддати,
Ўзбекларнинг заковати,
Туркманларнинг ҳалимлиги,
Қирғизларнинг ҳақпарварлиги етишмайди.

Балким бизда бу туйғу ва тушунчаларни шакллантириш учун анча меҳнат ва вақт талаб қилар.
Аммо ўзаро бирлашишимиз учун ҳеч қандай меҳнат ёки вақт талаб қилмайди!

Келинг қардошларим, бирлашайлик!
Мен барчангизни яхши кўраман!

Биз бу кунларга етиш учун не довонлар ошдик, не кирғинлар кўрдик, ни синовларда синалдик.
Шу даражага бирлигимиз билан етиб келдик.
Энди бирлигимиз янги поғоналарга кўтарилар чоғда иғвогарларнинг фитналарига учиб, бир-биримиздан шубҳага бормайлик!

Shaydoi Jannat

@eslatdim