​​Байрамларку ўз йўлига,оддий кунда, Ибодатдек бу амални этмай | Moon is...

​​Байрамларку ўз йўлига,оддий кунда,
Ибодатдек бу амални этмай канда,
Оллоҳ сўзсиз рози бўлар сиздан шунда,
Онангизни йўқланг аввал,Онангизни!

Йўлингизга кўз тикканлар қатор-қатор,
Совға берманг,хурматингиз бир пул,бекор,
Қўлингизга қарамаган яна ким бор,
Онангизни йўқланг аввал,Онангизни!

Келажакдан кўнглингизни тўқлаш учун,
Фарзанд деган лавозимни ёқлаш учун,
Бир кун берган оқ сутини оқлаш учун,
Онангизни йўқланг аввал, Онангизни!

Дийдорингиз жонига жон қўшмасму ё?
Жаннатингиз шу дунёда эмасму ё?
Фақат сизни дуо қилган икки дунё,
Онангизни йўқланг аввал,Онангизни!

Тирикчилик, турмуш,кунда бир муаммо,
Асли шундай яралган бу еру-само,
Болам дея яшасангиз яшанг,аммо,
Онангизни йўқланг аввал,Онангизни!

Юзидаги ажинларга сабабкорсиз,
Эгиккина бошгинасин босган қорсиз,
Тонгларингиз қолса қолсин ибодатсиз,
Онангизни йўқланг аввал,Онангизни!

Беш кунлиги борми,йўқми билолмайсиз,
Онадан сўнг бир кун ўйнаб-кулолмайсиз,
Жонни бериб қарзингизни тўлолмай,
ОНАНГИЗНИ ЙЎҚЛАНГ АВВАЛ,ОНАНГИЗНИ!

Малика Салимова