Бу сайын “Олесь Петрович муспут баайын-дуолун атыыллан эрэр үһ | Өйдөөх Бааска

Бу сайын “Олесь Петрович муспут баайын-дуолун атыыллан эрэр үһү” диэн сурах тарҕаммыта. Үгүс дьон итэҕэйбэтэҕэ, киһилэрэ олох кыккыраччы мэлдьэһэр этэ - “таптыыр Ньурбабыттан хаһан да көһүөм суоҕа!” диэн ыт эрэ буолан үрбэтэҕэ. Ол эрэн, дьиэтин атыылаабыта, араас техникатын, “лепснели” оһоҕун аа-дьуо атыылаан барбыта. Көһөр санааата суох киһи тоҕо дьиэтин атыылыай? Ол да буоллар “көспөппүн, ити барыта сымыйа сурах” диэн кэлэҕэйдээн да ылбакка кэлиилии кэбэ турбута.

Ити кэмҥэ быыбарга көхтөөхтүк кытта сылдьар этэ. Сакааһы толорор “политика киллера” буолан ол кэмҥэ улуус главатыгар кандидатынан турбут Алексей Михайлович Иннокентьевы сойуолаһартан атынынан дьарыктаммат этэ. Туох да ньыманы туттарын кэрэйбэт этэ – былыргы хобу-сиби көбүтүү, ол кэмҥэ буолбут тус иэдээнин туһаныы, ырдьыгы ханарытыы, атын дьон буруйун соҥнооһун, барыта туһаныллыбыта. Ол сылдьан бэйэтин былаастан атаҕастаммыт дьоруой курдук оҥостон кэбилэнэрэ. Ардыгар аһары баран ылара – били, бэйэтин олбуоругар “хохол пошел вон!” диэн суруммутун бары бэрткэ диэн өйдүүбүт. Ким да итэҕэйбэтэҕин өйдөөн, олохтоох дьон итинтэн кыйахаммытын көрөн, ити дьыаланы умуннара сатаабыта. Полициялаһыам диэн саанан баран биирдэ даҕаны дьыала ханна тиийбитин кэпсээбэтэҕэ. Ол эрэн, көрүҥ эрэ, төһөлөөх албастаах киһитин – ити эмиэ барарын бэлэмниир киитэрэйэ эбит! Уопсайынан, ити быыбарга мөлүйүөнүнэн хамнастаһар былааннаах этэ.

Былаана сатамматаҕа – сакаасчыта сатаммакка, быыбартан уһуллан хаалбыта. Олесь буоллаҕына өр сыллар тухары “үтүө киһи” уобараһын оҥостубута ыт кутуругун анныгар туох да манньата суох симиллибитэ. Туох баар бөрүкүтэ суох хамасаныыларын өйдөөн кэлбиттэрэ – арыгы атыылаан, точкалаан харчыласпыта, шиномонтаж арынан баран суолга тоһоҕо ыскайдаан “бизнестаабыта”, дьонтон күрэммит сордооҕу сүгүн олордубакка аат оҥостубута, байбыта барыта ахтыллыбыта. Бэйэлээх бэйэтин биир дойдулаахтарын аан дойду дьонноругар нууччалары абааһы көрөр, хохоллары холдьоҕор фашистар курдук көрдөрбүтүн кэннэ аанньа буолуо дуо? Ньурбаҕа эрэ буолбакка, Саха сирин үрдүнэн сүгүн олорботун оҥостубута. Соһулла сылдьан, Ленскэй, Чурапчы улуустарыгар аатын киртиппитэ, бүтэһигэр Ил Дарханы үөҕэр, холуобунай буруйга соҥнуур тойооску буолбута. Били аһыыр сиригэр саахтыыр сибиинньэ курдук дьаабыламмыта.

Биллэн турар, көһөөрү, сахалартан тэскилээри сылдьар барахсан, итинтэн уже долгуйбат этэ. Өйҕ санаата барыта соҕуруу дойдуга этэ. Сотору-сотору куруорт куораттарыгар Кисловодскайга, Сочига тиэстибитэ, саҥа дойду көрдөөн, билсии-көрсүү булан хамсаммыта. Москваҕа саҥа “дьүгэлэммитэ”, аатырбыт, бэйэтин курдук айдааннаах Авксентьева депутаты кытта булсубута. Анарааҥыта киртэн куттаммат блогеры бэйэтэ сиргэнэр дьыаларыгар туһанар былааннаах быһыылаах.

Ити курдук, “хаһан да көспөт” андаҕардаах “Ньурба патриота” биир күн сус гынан хаалла. “Кыра кэмҥэ көһөбүн, сотору төннүөм” диэн тыллаах. Саарбьах ини, төннөр киһи дьиэтин атыылааччыта суох. Аны барыан иннинэ сидьиҥ майгытын кыатаммакка, ааспыт “айымньыларын” көбүтэн хааларар сиригэр эбии сыптарыйан биэрдэ. Эмиэ урукку дойҕохторун хатылаан, сакаасчыттары, толорооччулары сыбыс-сымыйанан булкуйан, туолбатах билгэлэрин атаҕыттан баһыгар эргитэн бырдаҥалаата.

Дьон саҥатыттан куттаныа дуо, киэр барар барахсан. Эриэнин кистээбэт буолбут сүөһү төрөөбүт дойдутугар силлээн-хаахтаан араҕыста. Дьэ ити курдук Петрович, киэр дьүгэлий, эн курдук эриэн ыты ахтан ытыыр киһи манна хаалбата!

Манна киирэн сурутуҥ:
https://t.me/eideexbaaska

Өйдөөх Бааска