2023-06-02 11:44:04
Оҕо көмүскэлин күнэ - бу Аан дойдутааҕы бырааһынньык кырдьыга да, олус кэрэ кэмҥэ бэлиэтэнэр.
Ол курдук саҥа тыллар айылҕа уонна оҕо дьүөрэлии да буоллахтара. Күн курдук чаҕылыһа үөрбүт харахтар, былыта суох халлаанныы ып-ыраас санаалар, сибэкки курдук кэрэлэр, лыах курдук дайар үҥкүүһүттэр, күөрэгэйдиин тэҥҥэ ыллаһар чобуоххай куоластар. Бу дьүөрэлэһии барыта биһиги олохпут үөрүүтэ, кэрэтэ, кэскилэ, инники эрэлэ буолар.
Бүгүн П. Е. Барахсанов аатынан культура уонна сынньалаҥ пааркатыгар үөрүүлээх-көтүүлээх бырааһынньыкка оҕолуу тэҥҥэ үөрбүт-көппүт улахан дьону көрөн, онно эбии оҕо-аймах оҕуруолуу бытырыыстаһан кэлэн, сайыҥҥылыы сылаас, таһырдьа угуйар чаҕылхай күҥҥэ, оҕо-аймахха эрэ анаан, кустук сэттэ өҥүнэн ситэриллэн киһини өрө тардар - угуйар тэрээһиҥҥэ, бэйэтэ ыһыах тэҥэ элбэх киһи муһунна.
Музыка арааһа, ырыа-үҥкүү, минньигэстэн минньигэс ас эгэлгэтэ, кэрэ көстүүлээх чаҕылхай оонньуур атыыта, аттракционнар, күрэхтэр оҕо дьоҥҥо өссө биир үөрүүлээх үтүөкэн кэрэ түгэни, эһээлээх эбээҕэ сайылыы кэлбит сиэннэргэ умнуллубат түгэни бэлэхтээтэ.
Оҕо дьон туһа диэн сыралаһан эппиэтинэһи сүгэр тэрилтэлэр ситиһиилээх үлэһиттэригэр улуус уонна нэһилиэк дьаһалталара 105 сыллаах үбүлүөйдэринэн эҕэрдэлээн туран наҕараадалары туттартаатылар.
Ол кэннэ оҕо коляскатынан, велосипедынан уонна самокатынан парадтаан бырааһынньыгы олус сэргэх дьон арыйдылар.
«Star Dance - 2023» аныгы үҥкүү күрэҕин түмүгүн үөрүүлээхтик иһитиннэрдилэр, ону тэҥэ «Музыкальный пикник» диэн ыччаттарга ырыа, үҥкүү бэстибээлэ ыытылынна. «Эн кэмин» диэн «Совет патриотов» общественнай түмсүү бырайыага Ил Дархан гранынан өйөбүл ылан, сыл устата улуус сонуннарын биэрии үлэтин ситиһиилээхтик ыыппыта үөрүүлээх быһыыга-майгыга түмүктэннэ.
Оҕо көмүскэлин күнүн бэлиэтиир бырааһынньык чэрчитинэн, Чурапчы нэһилиэгин ТОСтарын икки ардыларыгар сыл ахсын ыытыллар комплекснай спартакиада бырааһынньык биир солун тэрээһининэн буолла.
Уопсайа хамаанда кыттыыны ылла, оҕолор бары да тэринэн, бэлэмнэнэн, ох курдук оҥостон кэлбиттэр.
Күрэхтэһии 5 түһүмэхтэн турда:
1. Ох саанан ытыы;
2. Үс төгүл үс;
3. 400 м сүүрүү;
4. Кулун тардыы;
5. Хапсаҕай.
Хамаандалар бары да эгил-тэгил түсүһэн, күрэхтэһиини бэрткэ сытыырҕаттылар.
Дьүүллүүр сүбэ быһаарыытынан хамаандалар маннык миэстэлэри үллэһиннилэр:
миэстэ – Яковлев Анатолий, «Куоҕалы» ТОС;
миэстэ – Иванов Антон, «Спортивнай» ТОС;
миэстэ – Старостин Юрий, «Чаран» ТОС.
Кыттааччылары оҕо көмүскэлин күнүнэн эҕэрдэлиибит, инникитин кыайыыга кынаттыыр элбэх ситиһиилээх дьаныардаах дьарыктары баҕарабыт.
Оҕолорбут инники кэскиллэрбит Аан дойду үрдүнэн бэлиэтэнэр бырааһынньыктара куруутун көмүскэллээх, чаҕылхай күннээх, ыраас халлаан анныгар эйэлээх олохтоох эрэ буола туруохтун!
«Чурапчы нэһилиэгэ» МТ дьаһалтата.
«ВКонтакте»: https://vk.com/wall-212041060_225
Хаартыскалар «Саҥа олох» таһарыытыттан ылылыннылар.
Ссылката: https://t.me/sanaoloh/10334
Ааптар: Сэмэн Жендринскэй.
435 views08:44
К
