Улуус дьаһалтатын баһылыгын Бастакы солбуйааччыта Семен ПОТАПОВ Мэҥэ-Хаҥалас улууһун Тыа хаһаайыстыбатын сайыннарыы боппуростарыгар үлэлээтэ.
Олохтоох бэйэ бородууксуйатын оҥорон таһаарыы билигин улахан болҕомтоҕо ууруллар. Тыа хаһаайыстыбатын сайыннарар сыаллаах-соруктаах кэлбит «Алмазэргиэнбанк» АКБ АУо Бырабылыанньатын Бэрэссэдээтэлин сүбэһитэ Людмила Николаева салайааччылаах делегация Мэҥэ-Хаҥалас улууһугар тайаан сытар быраҕыллыбыт бааһыналары миэстэтигэр тиийэн көрдө. Ынах-сүөһү иитиллэр комплекстарын үөрэттилэр, үрүҥ илгэттэн соҕотуопкаламмыт үүт ас хаачыстыбатын амсайдылар.
- Бу үс күннээх үлэ түмүгүнэн, баай опыттаах, киэҥ билиилээх специалистар биһиэхэ бааһыналары чөлүгэр түһэрии, бурдук үүннэрии, ынах-сүөһүнү иитии сөптөөх хайысхаларын ыйан-кэрдэн, сыаналаах сүбэ-ама биэриэхтээхтэр.
Оччотугар биһиги улууспутугар ынах-сүөһү элбииригэр, олохтоох бородууксуйа объема улаатарыгар төһүү күүс буолуоҕа, диэн эттэ Семен Потапов.
