Муус устар 28 күнүгэр Россияҕа суһал көмө үлэһитин күнэ
Суһал көмө үлэһиттэрэ күнүстэри-түүннэри дьон доруобуйатын туһугар туруулаһаллар. Кинилэр үлэлэригэр бэриниилэриттэн, эппиэтинэстэриттэн хас биирдиибит олоҕо тутулуктанар
Күннэтэ түбүктээх үлэҕитигэр ситиһиилэри баҕарабыт. Арыт кэмҥэ дьон туһугар бэйэҕитин, дьиэ кэргэҥҥитин да умнан туран, үлэ үөһүгэр сылдьаргытыгар махтал тылларын этэбит
Бүгүн эһиэхэ Полина - Победа хоһоонун аныыбыт
СУҺАЛ КӨМӨ
"Суһал көмө" массыына
Аттыбынан чыһыырда,
Ыҥырыыны тутаат да
Ыстаннаҕа ыалдьарга.
Өлөр өлүү үөһүттэн
Быыһыыр эрэ баҕалаах,
Эрэл кыымын күөдьүтэ
Тиийиэ күүтэр киһиэхэ.
Иэдээн эрэ тирээтэр,
Ыарыы эрэ ыалластар
"Суһал көмө" туһатын
Тута өйдүү түһэбит.
"Суһал көмө" дьонноро
Бэлэх, бэрик күүппэттэр -
Бэйэлэрэ киһиэхэ
Бэлэхтииллэр олоҕу!
Быыһаттарар, эрэнэр
Массыынабыт барахсан
Күнүстэри-түүннэри
Көлүөһэтэ эргийэр.
Көмө буолар көлөбүт
Кыһыл кириэс бэлиэлээх,
Үтүө эрэ сүрэхтээх
Сүүрдэригэр аналлаах.
Полина-Победа
Уус-Алдан.
