Град Халяп велик зело, в поле чисте видети его за три дни, а гора сыпана вельми высоко, да от самаго долу стены градныа, мурованы камением, да вход и выход едиными враты, да мост велик, да конец мосту того стрельница высока, да двои враты железные скрозе ея, да верху ея бои, да среди мосту того, такова же стрельница велиа зело; да пониже градскиа стены изо рва того, стрельницы выводима часты вельми, вкруг всего града и входы в них потайныа из града, да что мост из града чрез ров между стрельниц тех, как градская стена и с брамами. Да той град кругол, да во рве том вокруг всего града того, река велика приводна и глубока, рыбы в ней многое множество; да во круг града того больший град, множество торгов и бань хороших.
Хожение гостя Василия в Малую Азию, Египет и Палестину, 1465 г.
