2022-08-27 13:24:30
RASMIY MUNOSABAT
Joriy yilning 20-avgust kuni ijtimoiy tarmoqlarda Surxondaryo viloyati Sho‘rchi tumani “Oftobmakon” mahallasida yashovchi fuqaro Azim Raxmatovning video murojaati tarqaldi. Fuqaro o‘z murojaatida Surxondaryo viloyati davlat soliq boshqarmasi tomonidan pochta jo‘natmasi orqali yuborilgan xatda “Usarbobo” dehqon fermer xo‘jaligi uchun 186 mln so‘m soliq qarzdorlik mavjudligi ma’lum qilinganligi, lekin uning nomida hech qanday fermer xo‘jaligi yo‘qligini bildirgan. Ushbu murojaat o‘rganilganda quyidagilar ma’lum bo‘ldi.
Davlat soliq idoralari ma’lumotlar bazasida Raxmatov O‘tkir Jumayevich “Usarbobo” dehqon fermer xo‘jaligi rahbari, Raxmatov Azim Mamatmuminovich esa mazkur fermer xo‘jaligi ta’sischisi sifatida qayd etilgan. Shu sababli fermer xo‘jaligining mavjud 186 mln so‘m soliq qarzini ta’sischi Azim Raxmatovning mol-mulkidan subsidiar tartibda undirish yuzasidan Surxondaryo viloyati davlat soliq boshqarmasi tomonidan 2022-yil 8-avgust kuni da’vo arizasi tayyorlanib, fuqaro Azim Raxmatovga pochta orqali yuborilgan.
Qanday qilib, soliq idoralari ma’lumotlar bazasida Raxmatov Azim Mamatmuminovich “Usarbobo” dehqon fermer xo‘jaligi ta’sischisi sifatida qayd etilganligi o‘rganilganda esa quyidagilar ma’lum bo‘ldi.
“Usarbobo” dehqon fermer xo‘jaligi 1997-yil tuman (shahar)lar hokimliklari huzurida tashkil etilgan Tadbirkorlarni ro‘yxatga olish markazlarida ro‘yxatdan o‘tkazilib, fuqaro Zavra Alimardonova mazkur fermer xo‘jaligi rahbari bo‘lgan va 2018-yilga qadar u ushbu fermer xo‘jalikni boshqarib kelgan.
Zavra Alimardonova 2018-yil sentabr oyida nafaqaga chiqqanligi sababli fermer xo‘jaligiga rahbar etib o‘g‘li Raxmatov O‘tkir Jumayevichni tayinlangan. Raxmatov O‘tkir Jumayevich esa “Usarbobo” dehqon fermer xo‘jaligi Nizomini davlat xizmatlari markazida qayta ro‘yxatdan o‘tkazmagan va soliq organlariga fermer xo‘jaligi rahbari almashganligi to‘g‘risidagi ma’lumotlarni belgilangan muddatlarda taqdim etmagan. Shu bois soliq idoralari ma’lumotlar bazasida texnik xato natijasida Raxmatov Azim Mamatmuminovich “Usarbobo” dehqon fermer xo‘jaligi ta’sischisi sifatida qayd etilgan.
Mazkur xatolikni bartaraf etish maqsadida “Usarbobo” fermer xo‘jaligi rahbari Raxmatov O‘tkir Jumayevich tomonidan Davlat xizmatlari markaziga murojaat qilinib, ta’sischini o‘zgartirish maqsadida forma-8 hisobot shakli qaytadan to‘ldirildi va bugungi kungacha Davlat soliq organlarining ma’lumotlar bazasida “Usarbobo” fermer xo‘jaligi ta’sischisi sifatida qayd etilgan Raxmatov Azim Mamatmuminovich ma’lumotlar bazasidan o‘chirildi.
Yuqoridagi texnik xato va kamchiliklarga yo‘l qo‘ygani, amaldagi qonun talablariga ko‘ra yuridik shaxs (fermer xo‘jaligi) rahbar va ta’sischilari tarkibida bo‘lgan o‘zgarish yuzasidan Davlat xizmatlari markaziga murojaat qilib ma’lumotlarni to‘g‘rilab, qayta kiritmaganligi sababli “Usarbobo” fermer xo‘jaligi rahbari Raxmatov O‘tkir Jumayevichga nisbatan O‘zbekiston Respublikasi MJTKning 176(2)–moddasida ko‘rsatilgan huquqbuzarlikni sodir etganligi uchun 2022-yil 25-avgust kuni SD-005253-sonli ma’muriy huquqbuzarlik to‘g‘risidagi bayonnoma rasmiylashtirildi.
“Usarbobo” fermer xo‘jaligi rahbari Raxmatov O‘tkir Jumayevich tomonidan yo‘l qo‘yilgan xatolikni tuzatish bo‘yicha davlat xizmatlari markazi bilan birgalikda olib borilgan ishlar natijasida Surxondaryo viloyati davlat soliq organlari ma’lumotlari bazasidagi mazkur xatolik bartaraf etildi.
Surxondaryo viloyati DSB Matbuot xizmati
Telegram
214 viewsedited 10:24
S
