2021-03-10 11:01:58
амалиёт
Консультацияларимизнинг бирида суҳбатдошимни тинглаб туриб, ундан: Сиз бирор марта ўз вужудингизга миннатдорчилик билдирганмисиз? деб сўрадим.
Ва унга бир неча кун давомида ўз тана аъзоларига миннатдорчилик билдириш бўйича вазифа бердим.
Аввалига суҳбатдошим таажубланди, ҳатто мийиғида кулиб ҳам қўйди. Аммо қизиқиш устунлик қилиб, синаб кўрди (буни кейинчалик ўзи айтиб берди) ва натижа жуда аъло эди.
Ҳа, бугун сиз учун қизиқарли мавзу - тана аъзоларингизга миннатдорчилик билдириш ҳақида гаплашамиз.
Биз кўпинча ўзимиздан, хусусан тана қисмларидан норози бўламиз. Оёқларим ингичка, юзим ундай эмас, бармоқларим семиз, бўйим калта ва ҳакозо.
Таниш гапларми?!
Мен сизга ўзингизга ғамхўрлик қилиш, тўғри овқатланиш ва спорт билан шуғулланиш ҳақида гапирмоқчи эмасман.
Аммо сиз аниқ қилмаслигингиз керак бўлган нарса - "камчиликлар" ҳақида гапиришдан, ўйлашдан тўхтанг, демоқчиман.
Бизнинг вужудимиз мунтазам ва тўхтовсиз бир қанча муҳим функцияларни бажариши ҳақида ҳеч ўйлаб кўрганмисиз...
Ва бунинг учун уларга миннатдорчилик билдирганмисиз?!
Агар жавобингиз "йўқ" бўлса, буни зудлик билан бажаринг.
Гўё узоқ вақтдан бери жуда кўп айтмоқчи бўлган гапларингиз бор эдию, аммо қандайдир вақт йўқ эди.
Ўзингизда бор аъзоларда "нуқсонлар"ни кўришдан, улар билан курашишдан тўхтанг.
Ҳа, сиз ўйлаганингиздек, "ингичка" оёқларингиз бўлиши мумкин, аммо баъзиларда улар умуман йўқ.
Сизнинг юзингиздаги ҳуснбузарлар эса ички органларингиздаги ёки гормон тизимингиздаги қандайдир ўзгаришлар ҳақида сигнал бераяпти.
Уларга меҳр бериб, силаб қўйинг.
"Семиз" бармоқларингиз эса танангизга мос яратилган ва улар сизнинг беминнат ёрдамчиларингиздир.
Ахир улар бўлмаса, сиз ҳатто ёзишни ҳам уддалай олмасдингиз.
"Калта" бўйнингиз сизга бўйсуниб, қаддингизни тутиб турибдими, шукур қилинг.
Ахир қадди дол бўлиб, ҳассага таянганлар, бўйнини тик тутолмай, тўшакка қадалганлар қанча...
Рўйхатни ўзингиз давом эттиришингиз мумкин...
Шу лаҳзадан бошлаб, вужудингиздаги борки аъзоларга миннатдорчилик билдиринг.
Сизга бу неъматларни беминнат бериб қўйган Яратган Зотга ҳамд айтинг.
580 views08:01