2023-01-17 18:46:15
Қыздың бойынан табылуы керек ең бірінші қасиет.
Данияр Жігітбек ағамыз өзінің "Не үшін үйлену керек" атты кітабында қыз балалардың бойынан табылуы керек ең маңызды қасиеттерінің бірі -
мейірімділік екенін айтады.
Мейірімділік - бұл гармония, жанашырлық, адамды бағалау, оның көңіліне қарау, жұмсақтық. Мейірімсіз қыздар бола ма?
100% мейірімсіз қыз болмайды.
Аға былай айтады «
мейірімділік болмысына айналып кеткен және кейде мейірімділік танытатын қыздар бар» деп.
Данияр аға мейірімділік болмысына айналып кеткен қызды ізде деп кеңес береді.
Ондай қыз үлкендерге қатты сөз айта алмайды.
Табиғаты сондай. Ата-енесіне қатты сөз айтатын немесе оларға жаны ашымайтын келіндер де бар. Мысалы, келін-ене арасында бәрібір бір түсініспеушілік болады. Енесі келінінің көңіліне келетін бір сөз айтуы немесе бір әрекет істеуі мүмкін. Келіні іштей оған ашулануы да мүмкін. Бұл — заңды нәрсе. Сосын бір уақытта енесі ауырып қалса, міне, сол кезде қыздың қаншалықты мейірімді екені көрінеді.
Жаны ашып, қызметін жасай ма әлде «маған бәрібір» деп жүре бере ме? Мейірімді қыз қанша жерден өзіне қатысты зәбір көрсе де, басқаларға қатысты ондай нәрсе істей алмайды. Оның бойында ондай функция жоқ немесе өшкен.
Мейірімді қыз балаларға мейіріммен қарайды. Кейін балалары қанша жерден мазасын алып, миын жесе де, оларды тоқпақтауға дейін, үйден қуып жіберуге дейін бармайды.
Қыздың қаншалықты мейірімді екенін қалай білуге болады?.
Оның неге мән беретініне қарау керек. Адамның көңіліне көбірек қарай ма әлде өзінің жұмысы біткеніне ме? Өзін, өз қалауын екінші орынға қоя ала ма, жоқ па? Бұл өзіңді жақсы көрмеу, үнемі екінші орынға қоя беру дегенді білдірмейді.
Кейінгі кезде «алдымен өзіңді жақсы көр, өз шекараңды қорға, өз қалауыңды алдымен жүзеге асыр» деген сөздер көп айтылып кетті. Негізі қате сөз дей алмаймын. Бірақ оны шала түсініп, шала әрекеттер жасап жүргендер көп. Кейде ойлаймын осы біз психологиялық кітаптарды оқып алып, эгомызды одан сайын семіртіп жатқан жоқпыз ба деп. Эго бар жерде мейірім жоқ. Сенің өз эгоңды өшіре білуің өзгелерді бағалауыңа жол ашады.
Мейірімді болу үшін эгоңды өшіруің керек.
Меніңше, өзіңді жақсы көру деген нәрсе өзгелерді жақсы көруді де қамтуы керек сияқты. Яғни, менің өзімді жақсы көруім өзгелерді жақсы көруіме көмектеседі дегендей. Мен өзімді жақсы көруім арқылы өзгелерді жақсы көре түсемін. Екеуі бір-біріне кедергі келтірмейді.
Мысалы, бір психологтың әңгімесін естіп алған жас қыз-жігіттер ата-аналарына «менің өз шекарам бар, мен өз қалауымды орындаймын, өміріме араласпаңдар» деп шыға келуі мүмкін. Үлкеннің көңіліне қарау, мейірім таныту деген мәселені қарастырмайды да.
Сөйтіп ол өз дегенін жасайды. Енді ойлап көрейікші, осы әрекетті жасау арқылы ол өзгені, яғни, ата-анасын жақсы көріп тұр ма? Әлде тек эгосын семіртіп тұр ма? Ал былай істесе ше: мен ата-анама қызмет етейін, олардың көңіліне қуаныш сыйлауды ойлайын. Сол арқылы олардың мейірімге мұқтаждығын өтейін.
Негізі үлкен кісілер қартайған сайын бала сияқты бола бостайды. Мейірімге, көңілге мұқтаж бола бастайды.
Осылайша сен олардың жүрегін жылытасың, көңілін жібітесің. Батасын аласың. Өзіңді сүйікті сезінесің, біреуге керек екеніңді түсінесің. Өзіңді басқаша жақсы көре бастайсың. Сосын өз дегеніңді жасай берсең болады.
Осылайша сенің өзіңді жақсы көргеніңнен ешкім зардап шекпеуі керек.
Егер сенің өзіңді жақсы көргеніңнен біреу зардап шегіп жатса, онда тактикаңды өзгертіп көруің керек шығар.
300 views15:46