АЁЛ ЁЛҒИЗ ҚОЛМАСИН. Эркак--аёл доимо Жуфт бўлсин, тоқ бўлмасин. Бу дунёда, ё, Олло, Аёл ёлғиз қолмасин. Биз эрларни эр қилган, Арслон қилган, шер қилган, Ўзин ҳоксор-ер қилган, Аёл ёлғиз қолмасин. Ўзинг "Нисо"да айтдинг, Аёлни улуғ этдинг, Қўлига рўзғор тутдинг-- Аёл ёлғиз қолмасин. Маҳшарда бор сўроққа, Тайёр у ҳар қийноққа. Лек, зор қилма тирноққа, Аёл ёлғиз қолмасин. Аёлга рўзғор бергил, Юзига баҳор бергил. Роббим, фарзанд, ёр бергил, Аёл ёлғиз қолмасин. Тиконли гул бўлса ҳам, Ташвиши мўл бўлса ҳам, Эрига қул бўлса ҳам, Аёл ёлғиз қолмасин. Қувнатиб эр кўзини Пардозласин ўзини, Ўпсин ўғил-қизини, Аёл ёлғиз қолмасин. Шижоат қўш шаҳдига, Вафодор қил аҳдига. Эрларининг бахтига Аёл ёлғиз қолмасин. Шоир Ғайрат, сен кимсан, Ёринг йўқми -- ҳеч кимсан. Қўл оёқсиз, гунг-жимсан, Аёл ёлғиз қолмасин!!! Ғайрат МУҲАММАД Яқинларга улашинг @DIYDOR_SHIRIN 3.1K views08:21
