2022-08-11 21:36:04
*нус а ма ду адам.*
- жим-кӀант, хьо хаза ма вара, хьайна уллера чами схьакховдабехьа!
- аса хӀунда кховдош бу и хьоьга дӀа, айхьа схьаэца, нус йац хьо?
(дехьо лаьтташ йу кӀентан нана, несан марнана)
- ойй, и хӀун къамел ду, кӀант, ахь вайн несе дийриг? Нус ма ду адам. дӀавало сихха, дӀакховдабе цуьнга чами. иштта къамел деш кхин ма хазийталахь суна.
иза вайн нус хиларх, хьо санна цхьана ден а, ненан а йоӀ ма йу. хьо суна санна дукха йезаш, ас хьо санна, мацйалархий, хьагйалархий, шелйалархий ларйеш, цхьажимма дегӀана цатам хилча йаларна кхоьруш, иштта вайн доьзале, вайга схьайелла ма йу иза. вайгахь ма йу хӀокху вайн несан хӀусам. вайн доьзалхо ма йу иза.
маьл хала ду шен хьомечу дех, мерзачу ненах, йижарех, вежарех, ков - кертах къаста. Эхь бехк Дала лоьрийла, со шу дега йогӀучу хенахь, сан йелхар, ма хала дара суна сайн хьомечу дех, мерзачу ненах, йижарех, дикачу вежарех, къаста. айса мерза кхача кечбича уьш дага богӀий кийра рицкъа мича додара. сих-сиха къайлаха цхьа воцчохь йелхара со, цӀа са хьийзаш. иштта декъаза а, къинхетаме а са ду-кха йоӀ, нус.
- нана, къинтӀера йалахь суна, доккха гӀалат даьлла-кха соьгара. иштта хьо къинтӀера йалахь, тхан нус Амнат.
- Дала мукъ лахь, со къинтӀера йаьлла-кх хьуна, сан кӀант. И санна дерг кхин ма далийталахь хьайха, сан кӀант.
- вайй, жим-кӀант, со даиманна йу-кха хьуна къинтӀера йаьлла. суна хӀумма а хала ца хетта. Дала могуш-маьрша долуш, вовший лерам, барт болуш, вовший вуо ца гуш, хӀинца санна бертахь Ӏер-дахар лойла вайн кхин дӀа а.
Зайтемиров С.
229 viewsمحارب, edited 18:36