Ытыктабыллаах Чурапчы улууһун олохтоохторо! Улуус салалтатын | Чурапчинский улус
Ытыктабыллаах Чурапчы улууһун олохтоохторо!
Улуус салалтатын уонна тус бэйэм ааппыттан эһигини Оҕо көмүскэлин күнүнэн ис сүрэхпиттэн эҕэрдэлиибин!
Бэс ыйын 1 күнүгэр үгэскэ кубулуйбут кэрэ бырааһынньыгы – Оҕо көмүскэлин күнүн бэлиэтиибит. Оҕо хас биирдии төрөппүтү дьоллуур, үрдүккэ кынаттыыр, үчүгэйи, үтүөнү оҥорор дьулуурун, оҕотун көмүскүүр, харыстыыр баҕатын, тапталын, кыһамньытын, эппиэтинэһин күүһүрдэр. Оҕо барахсан хараҕа аһылларыгар, элбэҕи билэ-өйдүү улаатарыгар суолу тэлэн, онуоха бэйэбит үтүө холобур буолан, сиэрдээххэ, кырдьыкка уһуйан, ыарахаттартан чаҕыйбат дьоллоох киһи буола үүнэн тахсарыгар тирэх буолабыт. Оҕо көмүскэлин күнүн үрдүк анала – судаарыстыба уонна биһиги хас биирдиибит оҕолорбутугар сөптөөх усулуобуйаны тэрийэн, тиһигин быспакка иитэр-такайар соруктаахпытын санатыы.
Биһиги улууспутугар оҕолорбут бары өттүнэн үчүгэй усулуобуйаҕа сайдалларыгар, үөрэҕи-билиини иҥэринэллэригэр, киһилии сиэргэ, норуот төрүт култууратыгар уһуйуллууларыгар аналлаах аныгылыы быһыылаах уһуйааннар, оскуолалар, оҕо сайдар кииннэрэ, былаһааккалара сыллата тутуллаллар. Оҕолоох дьиэ кэргэттэри өйүүр дьаһаллар кэккэлэрэ кэҥэтилиннэ. 2022 сылга төрөөбүт оҕолорго “Сүүс сыл оҕолоро” тус сыаллаах хапытаал олохтонно. Итини тэҥэ, биир кэлим судаарыстыбаннай эксээмэҥҥэ муҥутуур үрдүк баалы ылбыт оскуоланы бүтэрэр бастыҥ үөрэнээччигэ 100 тыһыынча солкуобай кээмэйдээх биир кэмнээх төлөбүрү олохтонно.
Үөрэх уонна доруобуйа харыстабылын хаачыстыбата үрдүүрүгэр үлэҕэ болҕомто, ирдэбил үрдүү турар, эти-хааны чэбдигирдиигэ уонна успуордунан дьарыктаныыга усулуобуйа оҥоһуллар, араас куруһуоктар оҕо дьоҕурун чочуйаллар. Бу үлэ үксэ "Боотур Уус сыдьааннара" бырагырааманан былааннаахтык олоххо киирэллэр.
Күн бүгүн биһиги улууспут өрөспүүбүлүкэ биир бастыҥ улууһунан буолар. Онуоха сүрүн тирэхпит оҕолорбут буолаллар. Үүнэр сүһүөх ыччаппыт сарсыҥҥыта сырдык, кэскилэ кэрэ буоларыгар туох кыалларын барытын оҥоруохпут диэн эрэнэбин!
Күндү оҕолор! Бу сайыны көрсө буолар кэрэ бырааһынньыккытынан эһиэхэ дьоллоох оҕо сааһы, үтүө баҕа санааларгыт туолалларыгар, чэгиэн-чэбдик туругу баҕарабын! Хас биирдии дьиэ кэргэҥҥэ оҕо саҥата ыраахха чугдаардын, таптал уонна өйдөһүү өрөгөйдөөтүн!
