АККЫЫРАЙ ААРТЫГЫТТАН АСФАЛЬТ СУОЛГА Муус устар 12 күнүгэр Чу | Чурапчинский улус

АККЫЫРАЙ ААРТЫГЫТТАН АСФАЛЬТ СУОЛГА

Муус устар 12 күнүгэр Чурапчы сэлиэнньэтигэр ,,Дорожник" ХЭО таһааттарбыт ,,От архиерейских дорог до асфальта" диэн кинигэтин сүрэхтээһин үөрүүлээх тэрээһинэ буолла.
Бырааһынньыктыы киэргэтиллибит саалаҕа бу тэрилтэҕэ өр сылларга үлэлээбиттэр, кинигэ таһаарыытыгар үлэлэспиттэр, улуус, нэһилиэктэр салалталарыттан кэлбиттэр үөрэ-көтө киирэн олордулар.
Эҕэрдэ тылы бастакынан бу тэрилтэни өр кэмҥэ салайбыт, кинигэни хомуйан оҥорбут Саха Өрөспүүбүлукэтин суол хаһаайыстыбатын үтүөлээх үлэһитэ Федор Чичигинаров эттэ. Кини кинигэ суруллуутугар үлэ хайдах барбытын, кимнээх кыттыбыттарын сиһилии кэпсээтэ, сыралаах үлэлэрэ түмүктэнэн айымньылара күн сирин көрбүтүнэн махталын тиэртэ.
Кинигэ тутулун, ис хоһоонун сиһилии улуустааҕы кииннэммит библиотечнай ситим дириэктэрэ, култуура үтүөлээх үлэһитэ Вера Платонова билиһиннэрдэ.
Кинигэ Дьокуускайга ,,Көмүөл" кинигэ издательствотыгар нууччалыы тылынан бэчээттэммит. Улахан форматтаах, 500 экземплярдаах, электроннай ньыманан ааҕыллар.Үрдүк хаачыстыбалаах мелованнай кумааҕылаах, элбэх хаартыскалардаах. Аҕыс түһүмэххэ наардаммыт. Суол тутуута Чурапчы улууһугар бастаан саҕаланыытын билиһиннэрэр архыып докумуоннарыгар олоҕурбут матырыйааллар киллэриллибиттэр. Суол хаһаайыстыбата улууска сайдыытын историята, бэтэрээн суоппардар ахтыылара, суолу тутуу бэдэрээччиктэрин суруйуулара бааллар.
Эҕэрдэ тылы өр кэмнэргэ өрөспүүбүлүкэҕэ суол оҥоһуутугар салайар үлэлэлэргэ үлэлээбит Дмитрий Макаров, ,,Дорожник" ХЭО генеральнай дириэктэрэ Гаврил Владимиров, Чурапчы улууһун баһылыгын бастакы солбуйааччы Егор Сивцев, о.д.а. эттилэр.
Кинигэни таһаарыыга үлэлэспиттэргэ Бочуотунай грамоталар, өйдөбүнньүк бэлэхтэр туттарылыннылар. Саҥа, дьоһун кинигэ күн сирин көрбүтүнэн эҕэрдэ ырыалар дьиэрэйдилэр.
Алексей Слепцов.