Чурапчы улууһа социальнай-экономическай сайдыы бары хайысхалар | Чурапчинский улус

Чурапчы улууһа социальнай-экономическай сайдыы бары хайысхаларыгар өрөспүүбүлүкэҕэ инники күөҥҥэ сылдьыытыгар дьиэ- кэргэн ылар оруола улахан. Биллэн турар, үлэни-хамнаһы улуус дьаһалтата, бары управлениелара, отделлара сүрүннүүллэр, былаанныыллар, олоххо киллэриигэ үлэлэһэллэр.
Улуус дьаһалтатын биир улахан отделынан Дьиэ-кэргэн политикатын отдела буолар.

СҮБЭЛЭСТИЛЭР, БЫҺААРДЫЛАР
Дьиэ- кэргэн общество сүрүнэ, туллубат тутааҕа буоларын билэбит. Үлэни-хамнаһы тэрийиини, оҕону иитиини-үөрэтиини, кэскили түстээһини кинилэр быһаараллар.

Кулун тутар 15 күнүгэр дьиэ-кэргэн политикатыгар нэһилиэктэр дьаһалталарыгар, улуус киинигэр үлэлиир специалистар сааскы ыйдарга буолуохтаах дьаһалларга кыттыыны ылыыны тэрийиигэ сүбэлэстилэр.

Дьиэ кэргэн политикатыгар отдел сүрүннүүр специалиһа Татьяна Бушкова быйылгы элбэх үбүлүөйдэрдээх, бэлиэ даталардаах сылга туох соруктар туралларын, сүрүннээн чугастааҕы сааскы ыйдар былааннарын билиһиннэрдэ. Элбэх ыйытыылар киирэн эппиэттэннилэр, санааларын үллэһиннилэр.
Чугастааҕы соругунан Дьиэ- кэргэн күрэҕэр кыттыы буолар. Үс түһүмэҕинэн барыахтаах--муниципальнай, өрөспүүбүлүкэтээҕи, Бүтүн Россиятааҕы. Маныаха улууска бу күрэҕи тэрийиини, кимнээҕи ханнык номинацияҕа кытыннарары сүбэлэстилэр. Кыайыылаах дьиэ кэргэн улууһун чиэһин өрөспүүбүлүкэҕэ көмүскүөхтээх. Күрэххэ кыттыы усулуобуйата барыларыгар бэрилиннэ.
Кулун тутар 29 күнүгэр улууска үгэс буолбут Аҕа күрэҕэ буолар. Итиннэ кыттыы усулуобуйатын, ханнык тэрээһин үлэлэр барыахтаахтарын улуустааҕы Эр дьон түмсүүтүттэн Иван Лукин билиһиннэрдэ. Нэһилиэктэртэн кыттыыны ылааччылары тэрийиигэ, бэлэмнээһиҥҥэ хайдах үлэлэһэри сүбэлэстилэр.
Бастаабыттар өрөспүүбүлүкэтээҕи күрэххэ кыттыахтара.
Дьиэ-кэргэн күрэҕэр, Аҕа күрэҕэр инники сылларга чурапчылар ситиһиилээхтик кыттыбыттара. Быйылгы күрэхтэргэ ситиһиини!
Алексей Слепцов.