Дигорон æвзагмæ æййивдæй фиццаг хатт мухури цæуй Библий киунуг | Чырыстон Ир ☦️ Православная Осетия

Дигорон æвзагмæ æййивдæй фиццаг хатт мухури цæуй Библий киунугутæй еу — Йесо Киристей Евангели, Иоанни финст.
Библи æй, æгас дуйней адæм ахиддæр ке аргъаунцæ, еци киунугæ. Е æй æнæгъæнæ библиотекæ — æ хурфи ци дæсгай киунугутæ ес, уони еу мин анземæй фулдæрей дæргъци æртæ æвзагебæл финстонцæ берæ адæймæгтæ. Библиæн æ тæккæ зундгонддæр киунугутæ æнцæ цуппар Евангелий. Грекъаг дзурд «Евангели»-æн æ медес æй «фарни хабар». Уотæ исхундæй, зæнхæмæ Ка æрцудæй, Еци Ервæзунгæнæг Йесо Киристей туххæй хабар. Фæстæдæр еци ном лæвæрд æрцудæй, Йесо Киристей цард, Æ ахурадæ, Æ дессæгтæ, Æ рамæлæт æма Æ райгаси туххæй ка дзоруй, еци киунугутæн. Евангелитæй еуей ниффинста Киристей уарзон ахургæнуйнаг Иоанн. Финсгæ ба ’й никкодта нæуæг доги фиццаг æноси кæрони, грекъаг æвзагбæл. Фæстæдæр еци Евангели æййивд æрцудæй дуйней сæдæгай æвзæгтæмæ.
Hyp уомæн бакæсæн ес дигорон æвзагбæл дæр. Ка ’й ратæлмац кодта, етæ еуæрдигæй архайдтонцæ грекъаг тексти медес æнæ ихæлдæй, æхуæдæг куд æй, уотемæй равдесунбæл, иннердигæй ба тухстæнцæ уобæл, цæмæй текст æййивд цæуа дигорон æвзаги фæткæ æма æгъдæуттæмæ гæсгæ.

Евангелий автограф (автори къохфинст) æхуæдæг мах уæнгæ не ’рхъæрттæй, фал ин ес, раги дзамани къохæй ке рафинсионцæ, берæ уæхæн къопитæ. Дигорон æвзагмæ Евангели æййивд æрцудæй, нур ахургæндти къохти ка ес, еци тæккæ рагондæр къохфинститæмæ гæсгæ. Тæлмацæн æ бундори лæууй Евангелий грекъаг текст киунугæй The Greek New Testament. 4 Rev. Ed. ed. by B. Aland, K. Aland, J. Karavidopoulos, C.M. Martini, B.M. Metzger. Stuttgart, 1994.

Киунуги хурфи ес хузтæ, уæдта феппайуйнæгтæ. Сæ нисан æй киунугæкæсæгæн еуæй-еу дзурдтæ æма дзурдæздæхтити медес ирддæрæй равдесун. Киунугæн æ фæстаг фæрстæбæл ес, Йесо Киристе Æ зæнхон цард кæми рарвиста, еци Израили (Палестини) къартæ, уæдта Израилæн æ сæйраг сахар Иерусалими къартæ — Евангели ци цаутæбæл дзоруй, уонæн сæ фулдæр аци сахари æрцудæнцæ.
Библи тæлмацигæнæг институт арфæ кæнуй, Иоанни финст Евангели дигорон æвзагмæ раййевунбæл ка бакуста, уæдта ’й мухурмæ ка бацæттæ кодта, уонæн сæ еугуремæн дæр. Махæн æхцæуæн æй, дигорæнттæн дæр сæ маддæлон æвзагбæл Хуцауи Дзурд бааргъаунмæ фадуат ке фæцæй, е.

Библи тæлмацигæнæг институт