2024-04-09 10:14:15
Дубайданда артық өмір сүруі тиіс Атырау облысы халқы цыгандардың күйін кешті.
Атырау облысы, Жылыой ауданы Қазақстан бойынша ең бай ауданның қатарына жатады. Иә, сіз бұған күлетін боларсыз, жағдайы жоқ деп... Ендеше бастайық. Жылыой ауданынан шыққан депутат Сырымбек Сарсембаев 28.02.2024 ж. Жем өзені тасиды деп ескерту жасады парақшасында. Атырау облысы әкімі Серік Шәпкенов-ке хат жолдады. Ерте қамдану керек екендігін ескертті. Алайда оған құлақ асқан ешкім болмады. Жылыой ауданы әкімі, Құлсары қаласы әкімі, Атырау облысы әкімі түгелдей ОТСТАВКАҒА жөнелтуі тиіс! Орынбасарларымен бірге кетсін! Жылыой халқы ашынды. Осы уақытқа дейін тек мұнайды сора беріп, халықты қайыршылық деңгейге түсіріпті бұлар. Жылыой халқы тиіп тұрған Теңізшевройлдың өзіне жұмысқа орналаспақ түгілі, оның мердігер компанияларына алынбайды. Шеттетіледі. Жылыойда қажетті мамандар болса да, Тенгизге сырттан, басқа облыстардан жұмысқа адамдар тез орналасады. Жылыой халқының үлес салмағы әр мекемелерде тек 3-4%. Бізге жергілікті Құлсарыгаз, Өмірзақ, НСС, ESS статистикасын көрсетіп аудан халқы түгел жұмыспен қамтылған деп жалған ақпарат береді. Шынтуайтында дұрыс жақсы мекемелерде Жылыой адамдары санаулы ғана. Кешегі су тасқынында Жылыой азаматтары Құлсарыны қорғауға жұмыстарын тастап жүгірді. Сол үшін мекемелер оларды жұмыстан шығарамыз деп қорқытуда. Халықтың кредитке салған үйлері суда қалды. Өмір бойы жұмыс жасап, еңбек еткен жемістерінің күлі көкке ұшты. Түн ішінде Жылыой ауданы әкімінің орынбасары Гүлнафис Айшуақова толық эвакуация деп халықты дүрліктіріп жіберді. Жалаң аяқ, майкамен қашқандар болды, сәбилерін арқалап. Халықтың көшуіне газ, су, ток болмайды деген әңгіме себеп болды. Өте аянышты, қорқынышты жағдайдан өткен Жылыой халқы психологиялық соққы алды. Ал таңертең Жылыой ауданы әкімі өз орынбасарының сөзін жоққа шығарды, эвакуация тек суға кетейін деп тұрған ауылдарға қатысты деп. Әкім және оның орынбасарының сөзі әртүрлі инструментте ойнатылды. Су келе жатқанда Болашақ ықшамауданынан өтіп, әкімдеріміз Әуежай ықшамауданын суға батырмақ ойда болды. Ал ондағы үйлерде қария, кішкентай сәби балалар бар еді. Әкім конпенсация төленеді, суға кетсеңдер деп тұтас бір ауылды суға батырғысы келді. Бұл енді қиянат емей немене? Жаңа Қазақстан қағаз жүзінде ғана. Ауданда техника атымен жоқ па? Құлсарығы ТШО мекемесінің мыңдаған техникасы көмектеспегені қалай? Көмек көршілес Маңғыстау облысынан келді. Боранқұл, Бейнеу, Жаңа Өзен, Ақтау халқы ең бірінші болып көмек қолын созды. Үйлерін, мектеп, тойханаларын босатты. Жылыой халқын құшақ жая қарсы алды. ТШО тұрып, Жаңа Өзеннен техника алған ұят емес пе? Жаңа Өзеннің ӨзенМұнайГаз жұмысшылары жетіп келді көмекке. Міне нағыз азаматтар. 2011 жылы Жаңа Өзен халқы Қазақстан үшін тұрып берді. 2022 жылы халықты оятты. 2024 жылы Жылыойға көмекке келді. Біз оны Ұмытпаймыз! Ұмытылмақ емес. Үкіметтен бұрын МАҢҒЫСТАУ ХАЛҚЫНА ҮЛКЕН АЛҒЫС. Жылыой халқы да аянбай күндіз-түні қапшыққа топырақ толтырып, үйлерініің төбесіндегі шатырларын ашып, шифрларын суға қарсы қалқан қылып, топырақ төгіп барынша арпалысып Жылыойды қорғады. Аудандағы кәсіпкерлер шахман, камаз бәрін тегін берді. "Казкомсервис" мекемесі басынан бастап техникаларын жұмылдырды.
Ендігі мәселе: Жылыой халқының суға кеткен мүліктері қалпына келтірілсін! Жылыой азаматтары түгелдей жұмыспен қамтылсын! Жер кезегі жойылсын, ол үшін қажетті инфрақұрылым тартылсын! Суды бөгеп тастап отырған кәсіпкерсымақ шаруалардан жерлер қайтарылсын! Ауданға тәжірибесі бар әкімдер тағайындалсын, жұмыс жасай алатын. Жылыой ауданын көркейту жұмыстары қарқынды жүрсін. Жылыойдың орталығы Құлсары әдемі қала болып, жаңа құрылыстар жүргізілуі тиіс. Ауданға тұрғын үй салатын дұрыс мекемелер келуі керек. Жылыой халқы енді өз талаптарын қояды. Осы уақытқа дейін дегендеріңді жасадыңдар. Енді бәрі бұрынғыдай болмайды, халықтың талабы орындалуы тиіс!
БАС КЕСПЕК БОЛСА ДА, ТІЛ КЕСПЕК ЖОҚ!
Жылыой белсенділері
14.4K views07:14
Б
