2022-09-17 20:27:56
ӨСЕК
Арман болса егер де ырыс, бақыт,
Оңай емес күн кешу тыныш жатып!
Кейде өмірде кетеді бәзбіреулер,
Гүл ұстатқан қолыңа мұң ұстатып!
Алған кезде алқымдап жылдар сынға,
Бірді мысқа теңейді ел, бірді алтынға!
Мың адам кеп айқайлап Ай десе де,
Күн қашан да қалады Күн қалпында!
Жетпіс жерден жеп-ішсін көздер мейлі,
Нағыз мықты бәріне төзген дейді!
Қараңғыда қара деп шулағанмен,
Қардың түсі ешқашан өзгермейді!
Өмір талай сәттерді оздырады,
Өр тұлғаның өз шыңы-өз мұнары!
Қарға десе аққуды. Аққу емес,
ажырата алмаған көз кінәлі!
Сарғаймассың болса егер жаның көктем,
Көктем мәңгі от берер жалын леппен!
Ел не дейді екен дер әдетім жоқ,
Алла көріп тұрған соң бәрін көктен!
Рахат ӘБДІРАХМАНОВ
362 views17:27