2021-08-24 07:17:20
СЭРГЭХ СЭРЭДЭ КЭТЭҺЭР
Атырдьах ыйын 25 күнэ 19 чаастан
@saya_sakha @e_p_jirkov
Дьокутаакка хандьыдаат Егор ЖИРКОВТУУН быһа эфиргэ кэпсэтии
Билбэтим, үчүгэйим эбитэ дуу, куһаҕаным эбитэ дуу, САХА ТУҺА диэн быһаарыылаах кэм кэллэ дии санаатахпына туора туран хаалбат, чуумпутук хоһоон суруйа олорбот идэлээхпин. Ону, күндү сурутааччыларым, хайдах баарбынан ылынаргытыгар тиийэҕит . Кэнники күнүм сүрүн СОНУНУН иһитиннэрэбин.
Биһиги олохпут олуга быһаарыллар түһүлгэтэ - Госдуума диэн өйдүүбүн. Кэлэр биэс сылга Өрөспүүбүлүкэ дьылҕата, Арассыыйа даҕаны аан дойду таһымыгар туруга - барыта хайдах-туох, төһө таһымнаах дьокутааттар бу түһүлгэҕэ үлэлииллэриттэн тутулуктаах. Дойду үрдүттэн ТАЛЫЛЛЫБЫТ дьон өйдөрүн-санааларын күөн көрсүһүүтэ, хамнаныыларын көдьүүһэ, толкуйдарын далааһына абыраллаах, эбэтэр алдьатыылаах сокуоннар буолан биһиги олохпутугар киирэн кэлиэхтэрэ. Ону өйдөөн туран, бу буолаары турар быыбары көрсө эмиэ "сүгүн олорботум", уоппускабын уһатан туран, хандьыдаат Егор ЖИРКОВКА итэҕэллээх киһи буоллум.
Сарсын, атырдьах ыйын 25 күнүгэр, сэрэдэҕэ, киэһэ 19 ч Егор ЖИРКОВ бу мин сирбиттэн уонна бэйэтин @e_p_jirkov сирэйиттэн инстаграм ситимигэр БЫҺА ЭФИРГЭ тахсар .
Быйыл НВК редакторынан үлэлээбитим лоп курдук 20 сыла буолар эбит ээ. Ол тухары олохпут бары эйгэтиттэн үтүө-мааны дьону кытта эһиги хараххыт ортотугар кэпсэтэн кэллэҕим. Егор ЖИРКОВ курдук саха билиҥҥи кэмнээҕи сырдык төбөлөөх дьонуттан бастыҥнарын биэриибэр биирдэ эрэ ыалдьыттатан турабын. Тоҕо эрэ кинини киэҥ эйгэ көрүүтүгэр-истиитигэр таһаарбат буола сатыыр майгы баар буола сылдьыбыта. Оннооҕор биир биэриим бэлэмнэнэн баран, эфиртэн тохтотуллан турар. Онон, кини бу сылларга сайдыы туһугар, ийэ тыл туһугар тугу гыммыта дьоҥҥо-сэргэҕэ ситэ сырдатыллыбакка кэллэ диэн, иһитиннэрии эйгэтин иһигэр сылдьар киһи быһыытынан, баар чахчыларга олоҕуран этэбин. Ол иһин Егор ЖИРКОВТЫЫН бэйэтиниин кэпсэтиэххитин, киниэхэ быһаччы ыйытыыларгытын биэриэххитин баҕарар буолуохтааххыт.
Бэйэм эмиэ хандьыдаат быһа эфиргэ хайдах аһылларын көрүөхпүн баҕарар эбиппин. Бу күннэргэ элбэхтик ЗУМ нөҥүө көрсүһүүлэргэ кытынна, ону соло булан биирин да көрбөтүм. Онон, сарсын сэргэх киэһэ биһигини кэтэһэр, кэпсэтиигэ кыттаарыҥ, биллэриибин тарҕатаарыҥ диэн ыҥырабын
САЙА
439 views04:17